క్రాన్బెర్రీలు అనగానే అందరికీ గుర్తొచ్చేది యూరినరీ ట్రాక్ట్ ఇన్ఫెక్షన్స్. ఇందులో ఉండే ‘ప్రోయాంతోసైనిడిన్స్’ అనే ప్రత్యేక పదార్థం హానికర బ్యాక్టీరియా మూత్రాశయ గోడలకు అంటుకోకుండా అడ్డుకుంటుంది. ఇది ఇన్ఫెక్షన్లను తగ్గించడమే కాకుండా, పదే పదే వచ్చే సమస్యల నుండి దీర్ఘకాలిక ఉపశమనాన్ని ఇస్తుంది. కేవలం కిడ్నీలకే కాదు, మన చిరునవ్వుకు కూడా ఇవి మేలు చేస్తాయి. నోటిలోని బ్యాక్టీరియాను అరికట్టి, దంతాలపై పాచి చేరకుండా కాపాడటంలో క్రాన్బెర్రీలు అద్భుతంగా పనిచేస్తాయి. గుండె ఆరోగ్యానికి క్రాన్బెర్రీలు ఒక గొప్ప నేస్తం. వీటిలో ఉండే అధిక స్థాయి యాంటీ ఆక్సిడెంట్లు మరియు ఫ్లేవనాయిడ్లు శరీరంలోని చెడు కొలెస్ట్రాల్ను తగ్గించి, రక్తపోటును నియంత్రించడంలో సహాయపడతాయి. తద్వారా గుండె జబ్బుల ముప్పు తగ్గుతుంది. అంతేకాకుండా వీటిలో ఉండే పీచు పదార్థం, జీర్ణక్రియను మెరుగుపరుస్తుంది. మన శరీరంలోని కణాలను దెబ్బతీసే ఫ్రీ రాడికల్స్తో పోరాడి, వృద్ధాప్య ఛాయలు త్వరగా రాకుండా చేయడంలో ఈ ‘సూపర్ ఫుడ్’ తనదైన ముద్ర వేస్తుంది. క్రాన్బెర్రీలలో ఆక్సలేట్లు ఎక్కువగా ఉంటాయి. కాబట్టి, కిడ్నీలో రాళ్లు ఉన్నవారు లేదా ఆ సమస్య వచ్చే అవకాశం ఉన్నవారు వీటిని పరిమితంగా తీసుకోవాలి. అలాగే, మార్కెట్లో దొరికే క్రాన్బెర్రీ జ్యూస్లలో చక్కెర శాతం ఎక్కువగా ఉంటుంది. ఇది బరువు పెరగడానికి లేదా రక్తంలో చక్కెర స్థాయిలు పెరగడానికి కారణం కావచ్చు. కాబట్టి, ఎండబెట్టిన పండ్లు లేదా తాజా పండ్లను నేరుగా తీసుకోవడం ఉత్తమం.
0 Comments