చిన్నారి నిత్విక మృతి కేసు : ఘాతుకానికి ఒడిగట్టిన పక్కింటి వారు

ఆంధ్రప్రదేశ్ లోని వైఎస్ఆర్ కడప జిల్లా, లోపట్నుతల గ్రామానికి చెందిన మూడేళ్ల చిన్నారి నిత్విక అనుమానాస్పద మృతి కేసులో నిజాలు వెలుగులోకి వచ్చాయి. మొదట సాధారణ మరణంగా భావించిన ఈ ఘటనను పోలీసులు విచారించగా, అది పక్కా ప్రణాళికతో జరిగిన కిరాతక హత్యగా తేలింది. పాత కక్షలను మనసులో పెట్టుకుని పక్కింటి వారే ఈ ఘాతుకానికి ఒడిగట్టినట్లు పోలీసుల ప్రాథమిక విచారణలో స్పష్టమైంది. పోలీసుల కథనం ప్రకారం లోపట్నుతల గ్రామానికి చెందిన పక్కింటి దంపతులు స్వాతి, రామిరెడ్డిలకు చిన్నారి కుటుంబంతో కొంతకాలంగా పాత కక్షలు, వివాదాలు ఉన్నాయి. ఈ క్రమంలోనే పగ పెంచుకున్న ఆ దంపతులు, ఇంట్లో ఒంటరిగా ఉన్న మూడేళ్ల బాలిక నిత్వికను పట్టుకుని నీళ్ల డ్రమ్ములో ముంచి అత్యంత అమానుషంగా ప్రాణాలు తీశారు. అనంతరం ఏమీ తెలియనట్లు నాటకమాడారు. అనుమానం వచ్చిన కుటుంబ సభ్యులు పోలీసులకు ఫిర్యాదు చేయడంతో అసలు విషయం బయటపడింది. ప్రస్తుతం పోలీసులు నిందితులు స్వాతి, రామిరెడ్డిలను అదుపులోకి తీసుకుని విచారిస్తున్నారు.