కొత్తగా మరో 7,792 మందికి ఎన్టీఆర్ భరోసా మంజూరు

ఆంధ్రప్రదేశ్‌లో పెన్షన్ల పంపిణీకి సంబంధించి కూటమి ప్రభుత్వం మరో కీలక నిర్ణయం తీసుకుంది. రాష్ట్రంలో కొత్తగా మరో 7,792 మంది వితంతువులకు 'ఎన్టీఆర్ భరోసా' సామాజిక పెన్షన్లను ప్రభుత్వం మంజూరు చేసింది. ఈ నూతన లబ్ధిదారులందరికీ వచ్చే ఆగస్టు నుంచే పెన్షన్ల పంపిణీ జరగనుందని రాష్ట్ర మంత్రి కొండపల్లి శ్రీనివాస్ అధికారికంగా వెల్లడించారు. మరోవైపు, ప్రతి నెలా ఒకటో తేదీన చేపట్టే సామాజిక పెన్షన్ల పంపిణీ కార్యక్రమాన్ని ప్రభుత్వం ప్రతిష్టాత్మకంగా తీసుకుంది. ఇందులో భాగంగా జులై 1వ తేదీన రాష్ట్రవ్యాప్తంగా ఉన్న లబ్ధిదారులందరికీ పెన్షన్లు అందించడం కోసం ప్రభుత్వం ఏకంగా రూ.2,711.79 కోట్ల నిధులను విడుదల చేసింది. నూతన కూటమి ప్రభుత్వం అధికారంలోకి వచ్చినప్పటి నుంచి పేదలు, వృద్ధులు, వితంతువులు మరియు దివ్యాంగుల సంక్షేమానికి అత్యధిక ప్రాధాన్యత ఇస్తోంది. గతంలో పెన్షన్ మొత్తాన్ని పెంచడంతో పాటు, ప్రతి నెలా ఒకటో తేదీనే లబ్ధిదారుల ఇళ్ల వద్దకే వెళ్లి నిధులు పంపిణీ చేసేలా యంత్రాంగాన్ని సిద్ధం చేసింది. ఈ క్రమంలోనే ఇప్పటివరకు కూటమి ప్రభుత్వం సామాజిక పెన్షన్ల కోసమే రికార్డు స్థాయిలో మొత్తం రూ.68,598.44 కోట్ల రూపాయలను ఖర్చు చేసిందని మంత్రి కొండపల్లి శ్రీనివాస్ వివరించారు. అర్హులైన ప్రతి ఒక్కరికీ సంక్షేమ ఫలాలు అందించడమే లక్ష్యంగా ప్రభుత్వం ముందుకు సాగుతోందని ఆయన స్పష్టం చేశారు.