చంద్రబాబుకు ఫోన్ చేసి తుఫాన్ తాజా పరిస్థితుల గురించి ఆరా తీసిన మోడీ !

మొంథా తుఫాన్ రాష్ట్ర తీరాన్ని తాకబోతోందన్న సమాచారం నేపథ్యంలో కేంద్రం పూర్తి సహకారం అందిస్తుందని నరేంద్ర మోడీ హామీ ఇచ్చారు. ముఖ్యమంత్రి నారా చంద్రబాబు నాయుడుకు ప్రధాని నరేంద్ర మోడీ ఫోన్ చేసి తాజా పరిస్థితుల గురించి ఆరా తీశారు. రాష్ట్ర ప్రభుత్వం ఇప్పటికే అన్ని విభాగాలను అలర్ట్‌ మోడ్‌లో ఉంచగా, మోడీ ఫోన్ రావడంతో సన్నద్ధత పనులు మరింత వేగం పుంజుకున్నాయి. ఇప్పటికే కేంద్ర హోంశాఖ, రక్షణ శాఖలతో సమన్వయం కొనసాగుతోందని ఆయనకు చంద్రబాబు నాయుడు వివరించారు. తుఫాన్ ప్రభావం తగ్గించే దిశగా ఏపీలో రెవెన్యూ, విద్యుత్, పంచాయతీరాజ్, వ్యవసాయ శాఖలు అత్యవసర చర్యలు చేపట్టాయి. తీర ప్రాంతాల్లోని ప్రజలను సురక్షిత ప్రాంతాలకు తరలించేందుకు పెద్ద ఎత్తున ఏర్పాట్లు జరుగుతున్నాయి. వాతావరణ శాఖ తాజా అంచనా ప్రకారం, మొంథా తుఫాన్ రేపు రాత్రికి ఉత్తర కోస్తాను తాకే అవకాశం ఉంది. ముఖ్యంగా శ్రీకాకుళం, విజయనగరం, విశాఖపట్నం జిల్లాల్లో గాలి వేగం గంటకు 100 కి.మీ.ల వరకు వీస్తుందని హెచ్చరికలు వెలువడ్డాయి. ఇప్పటికే పలు చోట్ల వర్షాలు ప్రారంభమయ్యాయి. రోడ్లు జలమయం అయ్యాయి. విద్యుత్ సప్లై నిలిచిన ప్రాంతాలు కూడా ఉన్నాయి. ఈ నేపథ్యంలో, ఏపీ ప్రభుత్వం ఎన్డీఆర్ఎఫ్, ఎస్‌డీఆర్ఎఫ్ బృందాలను మోహరించింది. ప్రజల ప్రాణ, ఆస్తి నష్టం జరగకుండా జాగ్రత్తలు తీసుకోవాలని చంద్రబాబు అధికారులను ఆదేశించారు. తుఫాన్ తర్వాత వెంటనే విద్యుత్, రోడ్లు, త్రాగునీటి వసతులు పునరుద్ధరించేందుకు అవసరమైన సిబ్బంది, వాహనాలు సిద్ధంగా ఉంచాలని సూచించారు.