వాట్సాప్‌లో ‘ఇమాజిన్’ టూల్స్‌ : సాధారణ ఫోటోలను విభిన్న శైలుల్లోకి మార్చుకునే వీలు

వాట్సాప్ తాజాగా iOS బీటా వినియోగదారుల కోసం అత్యంత ఆసక్తికరమైన అప్‌డేట్స్‌ను తీసుకువచ్చింది. గతంలో ఆండ్రాయిడ్ వినియోగదారులకు మాత్రమే పరిమితమైన కొన్ని అడ్వాన్స్‌డ్ ఫీచర్లు, ఇప్పుడు ఐఫోన్ యూజర్లకు కూడా అందుబాటులోకి వస్తున్నాయి. ఈ అప్‌డేట్‌లో ప్రధానంగా ఆర్టిఫిషియల్ ఇంటెలిజెన్స్ ఆధారిత స్టేటస్ టూల్స్ , ఛానల్స్ వృద్ధికి ఉపయోగపడే ఇన్వైట్ ఫీచర్లు హైలైట్‌గా నిలుస్తున్నాయి. వాట్సాప్ స్టేటస్ ప్రియుల కోసం మెటా ఏఐ సహకారంతో సరికొత్త ‘ఇమాజిన్’ టూల్స్‌ను ప్రవేశపెట్టింది. దీని ద్వారా వినియోగదారులు తమ స్టేటస్ ఫోటోలను మునుపెన్నడూ లేని విధంగా ఎడిట్ చేసుకోవచ్చు. సాధారణ ఫోటోలను అనిమే, కామిక్ బుక్, పెయింటింగ్, 3D లేదా వీడియో గేమ్ వంటి విభిన్న శైలుల్లోకి మార్చుకునే వీలు కలుగుతుంది. ఇవి కేవలం ఫిల్టర్లు మాత్రమే కాకుండా, ఏఐ సాంకేతికతతో ఇమేజ్‌ను పూర్తిగా రీ-డిజైన్ చేస్తాయి. అంతేకాకుండా, వినియోగదారులు చిన్న టెక్స్ట్ ప్రాంప్ట్స్ ద్వారా ఫోటోలోని వస్తువులను మార్చడం, కొత్త అంశాలను జోడించడం లేదా ఫోటోలను యానిమేషన్ చిత్రాలుగా మార్చడం వంటివి నేరుగా వాట్సాప్ అప్లికేషన్‌లోనే చేయవచ్చు. దీనివల్ల థర్డ్ పార్టీ ఎడిటింగ్ యాప్స్‌పై ఆధారపడాల్సిన అవసరం తప్పుతుంది. వాట్సాప్ ఛానల్స్ నడుపుతున్న అడ్మిన్లకు ఈ అప్‌డేట్ పెద్ద ఊరటనిస్తోంది. ఇప్పటివరకు ఛానల్ ఫాలోవర్లను పెంచుకోవడానికి కేవలం పబ్లిక్ లింక్ షేర్ చేయడం మాత్రమే మార్గంగా ఉండేది. కానీ కొత్త ‘ఛానల్ ఇన్వైట్’ ఫీచర్ ద్వారా, అడ్మిన్లు తమ కాంటాక్ట్ లిస్ట్‌లో ఉన్న సుమారు 64 మంది వ్యక్తులకు నేరుగా ఆహ్వానాలు పంపవచ్చు. అయితే ఇది స్పామ్ కాకుండా ఉండటానికి వాట్సాప్ తగిన జాగ్రత్తలు తీసుకుంది. అడ్మిన్ ఫోన్ నంబర్‌ను సేవ్ చేసుకున్న వారికి మాత్రమే ఈ ఇన్విటేషన్లు వెళ్తాయి. దీనివల్ల కేవలం తెలిసిన , నమ్మకమైన వ్యక్తులతోనే ఛానల్ వృద్ధి చెందే అవకాశం ఉంటుంది. ప్రస్తుతం ఈ రెండు ఫీచర్లు ‘టెస్ట్ ఫ్లైట్’ ప్రోగ్రామ్ ద్వారా కొంతమంది బీటా వినియోగదారులకు మాత్రమే అందుబాటులో ఉన్నాయి. వాట్సాప్ వీటి పనితీరును పరిశీలించిన తర్వాత త్వరలోనే ప్రపంచవ్యాప్తంగా ఉన్న సాధారణ వినియోగదారులందరికీ స్టేబుల్ వెర్షన్ ద్వారా ఈ ఫీచర్లను విడుదల చేయనుంది. ఈ మార్పులతో వాట్సాప్ కేవలం మెసేజింగ్ యాప్‌గా మాత్రమే కాకుండా, ఒక క్రియేటివ్ సోషల్ మీడియా ప్లాట్‌ఫామ్‌గా కూడా మారుతోంది.