నగరి తిండివనం రైలు మార్గం పనుల స్పీడ్ ను పెంచిన దక్షిణ మధ్య రైల్వే

దాదాపు రెండు దశాబ్దాల నుంచి నత్తనడకన నడుస్తున్న నగరి తిండివనం రైలు మార్గం పనుల స్పీడ్ ను దక్షిణ మధ్య రైల్వే పెంచింది. ప్రస్తుతం నగరి- పొడత్తూరు పేట రైల్వే లైన్ పనులు శరవేగంగా జరుగుతున్నాయి. ఈ ప్రాజెక్టులో మొత్తం 184 .45 కిలోమీటర్ల రైల్వే లైను ఏర్పాటు చేయాలని 2008లో రైల్వే సంకల్పించింది. ఇక అప్పటి నుండి ఇప్పటి వరకు చాలా నిదానంగా పనులు జరుగుతుండగా, నగరి- పొడత్తూరు పేట రైల్వే లైన్ పనులు మొత్తం 13 కిలోమీటర్ల ఈ విస్తరణను 2026 మార్చి నాటికి పూర్తి చేస్తారని భావిస్తున్నారు. మొత్తం ప్రాజెక్టు 2028నాటికి పూర్తి కావాలని లక్ష్యంగా పెట్టుకున్నారు. దీర్ఘకాల ఆలస్యమైన ఈ ప్రాజెక్టు ప్రస్తుతం జరుగుతున్న అనేక రైల్వే అభివృద్ధి ప్రాజెక్టులలో భాగంగా ముందుకు వెళుతుంది. ఈ ప్రాజెక్టును రెండు దశల్లో అమలు చేస్తున్నారు. మొదటి దశలో ఆంధ్రప్రదేశ్ రాష్ట్రంలోని నగరి నుండి తమిళనాడులోని వాలాజా రోడ్ జంక్షన్ వరకు 65కిలోమీటర్లు, ఇక రెండవ దశ వాలాజా రోడ్డు నుండి తిండివనం వరకు 120కిలోమీటర్లు నిర్మించాలని లక్ష్యంగా పెట్టుకున్నారు. ఈ రైల్వేలైన్ పూర్తయితే గంటకు 130 కిలోమీటర్ల వేగంతో ప్రయాణం చేసే రైళ్లు ఈ లైన్ పైన ప్రయాణం చేయవచ్చు. ఈ రైల్వే లైన్ కీలకమైన పారిశ్రామిక కేంద్రాలకు కనెక్టివిటీని పెంచుతుందని ప్రధాన గమ్యస్థానాలకు ప్రత్యామ్నాయ మార్గాలను అందిస్తుందని భావిస్తున్నారు. దీర్ఘకాలం పెండింగ్ ఉన్న ఈ ప్రాజెక్టును ఇప్పుడు స్పీడ్ పెంచి పట్టాలెక్కిస్తున్నారు.