కేంద్ర మంత్రి కుమార స్వామికి అస్వస్థత !

కేంద్ర ఉక్కు శాఖ మంత్రి, జేడీ(ఎస్) నేత హెచ్. డి. కుమార స్వామి ఆదివారం తీవ్ర అనారోగ్యానికి గురయ్యారు. దీంతో సిబ్బంది వెంటనే ఆయన్ని బెంగళూరులోని ఓ ప్రైవేట్ ఆసుపత్రికి తరలించారు. బెంగళూరులో ఏర్పాటు చేసిన విలేకర్ల సమావేశంలో కేంద్ర మంత్రి కుమారస్వామి మాట్లాడుతున్న సమయంలో ఆయన ముక్కు నుంచి ఒక్కసారిగా రక్తం స్రవించడం ప్రారంభమైంది. ఈ విషయాన్ని విలేకర్లు గమనించి వెంటనే కేంద్ర మంత్రికి తెలియజేశారు. దీంతో కుమారస్వామి తన ముక్కు రంధ్రాలను గుడ్డతో అడ్డుకునే ప్రయత్నం చేశారు. ఆ వెంటనే భద్రత సిబ్బంది అప్రమత్తమ్యారు. ఆ క్రమంలో ఆయన్ని సమీపంలోని ఆసుపత్రికి తరలించారు. ముక్కు నుంచి ధారాపాతంగా కారుతుండడంతో ఆయన చొక్క మొత్తం రక్తంతో తడిసిపోయింది. ముడా కుంభకాణంపై పోరాటానికి సంబంధించిన కార్యాచరణపై ఆదివారం బీజేపీ, జేడీఎస్ నేతలు సమావేశమయ్యారు. అనంతరం విలేకర్ల సమావేశం ఏర్పాటు చేశారు. ఈ విలేకర్ల సమావేశంలో ఆయన మాట్లాడుతుండగా ఈ ఘటన చోటు చేసుకుంది.