ఢిల్లీ లో తొలి మహిళా బస్‌ డిపో 'సఖి' ప్రారంభం !

ఢిల్లీ లో తొలి మహిళా బస్‌ డిపోను రాష్ట్ర రవాణా మంత్రి కైలాశ్‌ గహ్లోత్‌ ప్రారంభించారు. సరోజిని నగర్‌లో పూర్తిస్థాయి మహిళా సిబ్బందితో కూడిన ఈ డిపోకు సఖి అని పేరు పెట్టినట్లుగా పేర్కొన్నారు. ఇందులో సిబ్బంది అంతా మహిళలే అని దీని కోసం మొత్తం 225 మంది సిబ్బందిని కేటాయించామని ఆయన తెలిపారు. అన్ని రంగాల్లో ముందుకు వెళ్తున్న మహిళలు రవాణా రంగంలోనూ తమ హక్కులను పొందాలనే ఉద్దేశంతో ఈ డిపోను ప్రారంభించినట్లు మంత్రి పేర్కొన్నారు. ఇప్పటికే చాలామంది మహిళలు బస్‌ కండక్టర్లుగా, ఇతర సిబ్బందిగా తమ సేవలు అందిస్తున్నారని, ఇకపై డ్రైవర్లుగానూ తమ ప్రతిభను చాటుకుంటారని అన్నారు. దేశంలో ఇది ఒక కొత్త ట్రెండ్‌ను సెట్‌ చేస్తుందని విశ్వాసం వ్యక్తం చేశారు. కాగా దేశంలోనే తొలి 'మహిళా' బస్‌ డిపోను ప్రారంభించడం మంచిదే అయినా ప్రస్తుతం రవాణా రంగంలో పని చేస్తున్న తమకు సరైన సౌకర్యాలు లేవని మహిళా ఉద్యోగులు మంత్రి ఎదుట నిరసన చేపట్టారు. ఫిక్స్‌డ్‌ జీతం, పర్మినెంట్‌ ఉద్యోగాలకు మంత్రి హామీ ఇవ్వాలని డిమాండ్‌ చేశారు. విధులకు హాజరు కావాలంటే ఉదయం ఆరు గంటలకే ఇళ్ల నుంచి బయల్దేరి..కిలోమీటర్ల మేర ప్రయాణం చేయాలని అయినా ఒక్కోసారి సమయానికి పని ప్రదేశానికి చేరుకోలేక ఇబ్బందులు పడుతున్నామని ఆవేదన వ్యక్తం చేశారు. మహిళా ఉద్యోగులతో మాట్లాడిన మంత్రి కైలాశ్‌ గహ్లోత్‌ వారి డిమాండ్లు నెరవేరుస్తామని, మెరుగైన సౌకర్యాలు కల్పిస్తామని హామీ ఇచ్చారు.