ఉద్యోగ్ భవన్ సమీపంలో భారీ అగ్నిప్రమాదం

ఢిల్లీ నడిబొడ్డున ఉన్న అత్యంత రద్దీ ప్రాంతమైన ఉద్యోగ్ భవన్ సమీపంలోని మురికివాడ (స్లమ్ ఏరియా)లో బుధవారం  మధ్యాహ్నం ఒక్కసారిగా భారీ అగ్నిప్రమాదం సంభవించింది. దట్టమైన పొగలు, మంటలు చుట్టుపక్కల ప్రాంతాలకు వేగంగా వ్యాపించడంతో స్థానికులు తీవ్ర భయాందోళనలకు గురయ్యారు. సమాచారం అందిన వెంటనే స్పందించిన ఢిల్లీ ఫైర్ సర్వీసెస్  సిబ్బంది రెస్క్యూ ఆపరేషన్ చేపట్టారు. అదృష్టవశాత్తూ ఈ ప్రమాదంలో ఎలాంటి ప్రాణనష్టం జరగకపోవడంతో అధికారులు, స్థానికులు ఊపిరి పీల్చుకున్నారు. మురికివాడలో ఇళ్లు ఒకదానికొకటి ఆనుకుని ఉండటం, ప్లాస్టిక్ వంటి త్వరగా మంటలు అంటుకునే వస్తువులు ఎక్కువగా ఉండటంతో అగ్నికీలలు క్షణాల్లో ఎగసిపడ్డాయి. ప్రమాద తీవ్రతను గమనించిన అధికారులు విడతల వారీగా మొత్తం 20 ఫైరింజన్లను (Fire Tenders) ఘటనా స్థలానికి తరలించారు. ఇరుకైన గల్లీలు కావడంతో అగ్నిమాపక సిబ్బంది తీవ్ర ఇబ్బందులు ఎదుర్కొన్నప్పటికీ.. దాదాపు మూడు గంటల పాటు నిరంతరాయంగా శ్రమించి మంటలను పూర్తిగా అదుపులోకి తెచ్చారు. ప్రమాదం జరిగిన సమయంలో మురికివాడలోని ప్రజలు అప్రమత్తమై బయటకు పరుగులు తీయడంతో పెద్ద ముప్పు తప్పింది. ప్రాథమిక సమాచారం ప్రకారం.. ఈ అగ్నిప్రమాదానికి ఏదైనా ఇంట్లో జరిగిన షార్ట్ సర్క్యూట్  లేదా వంట గ్యాస్ సిలిండర్ లీకేజీ కారణమై ఉండవచ్చని అగ్నిమాపక శాఖ అధికారులు భావిస్తున్నారు. అయితే ప్రమాదంలో పలు గుడిసెలు, ఇళ్లలోని సామాగ్రి పూర్తిగా బూడిదయ్యాయి. నష్ట తీవ్రతపై రెవెన్యూ అధికారులు అంచనా వేస్తున్నారు. ఢిల్లీ పోలీసులు కేసు నమోదు చేసుకుని దర్యాప్తు ప్రారంభించారు.