అమెరికా గ్రీన్లాండ్ను ఆక్రమిస్తే సోవియట్ యూనియన్ కాలం నాటి దేశాలను రష్యా ఆధీనంలోకి తీసుకుంటుంది !
అమెరికా గ్రీన్లాండ్ను ఆక్రమిస్తే, రష్యా కూడా సోవియట్ యూనియన్ కాలం నాటి ఆర్మేనియా, జార్జియా,అజర్బైజాన్, కజకిస్తాన్, ఉజ్బెకిస్తాన్, తజికిస్తాన్, కిర్గిజిస్తాన్ దేశాలను తన ఆధీనంలోకి తీసుకుంటుందని పుతిన్ గురువుగా భావించే అలెగ్జాండర్ దుగిన్ హెచ్చరించారు. డొనాల్డ్ ట్రంప్ ఇటీవల గ్రీన్లాండ్, వెనిజులా, కెనడాలను అమెరికాలో భాగంగా చూపుతూ ఒక కొత్త మ్యాప్ను విడుదల చేయడం ప్రపంచవ్యాప్తంగా కలకలం రేపింది. ఈ నేపథ్యంలో రష్యా వ్యూహకర్త అలెగ్జాండర్ దుగిన్ చేసిన వ్యాఖ్యలు ఉద్రిక్తతలను మరింత పెంచుతున్నాయి. దుగిన్ అభిప్రాయం ప్రకారం, అమెరికా తన జాతీయ భద్రత పేరుతో కొత్త భూభాగాలను ఆక్రమిస్తే, రష్యా కూడా అదే బాటలో పయనిస్తుంది. అమెరికా గ్రీన్లాండ్ను ఆక్రమిస్తే, రష్యా కూడా పాత వలసవాద పద్ధతిలో విస్తరించాలని దుగిన్ సూచించారు. "ట్రంప్ ప్రపంచంలో కేవలం క్రూరమైన బలం మరియు విధ్వంసానికే విలువ ఉంటుంది" అని ఆయన వ్యాఖ్యానించారు. అంతర్జాతీయ చట్టాలను పక్కన పెట్టి, రష్యా తన రాజకీయ, ఆర్థిక మరియు సైనిక ప్రభావాన్ని మధ్య ఆసియా మరియు కాకసస్ ప్రాంతాలలో భారీగా పెంచుకోవాలని పుతిన్కు సలహా ఇచ్చారు. ప్రపంచం కేవలం అమెరికా, రష్యా, చైనాల ఆధిపత్యం కింద ఉండాలని, దీని కోసం రష్యా తన సరిహద్దులను విస్తరించుకోవాలని ఆయన పేర్కొన్నారు. బాల్టిక్ దేశాలు మరియు మోల్డోవాపై ఒత్తిడి పెంచడం గురించి కూడా ఆయన హెచ్చరించారు.
