వైద్య సాంకేతిక రంగంలో ఒక అద్భుతమైన సాంకేతిక పరిజ్ఞానాన్ని హైదరాబాద్లోని బిట్స్ పిలానీ యూనివర్సిటీ ప్రొఫెసర్ లు అందించారు. మూత్రపిండాల పనితీరులో లోపాలను కేవలం నిమిషాల వ్యవధిలో గుర్తించే చిన్న పోర్టబుల్ పరికరాన్ని వారు విజయవంతంగా తయారు చేశారు. ఈ ఆవిష్కరణ వల్ల రోగులు ఆసుపత్రులు లేదా డయాగ్నోస్టిక్ ల్యాబ్లకు వెళ్లాల్సిన అవసరం తప్పుతుంది. ఇంటి వద్ద లేదా గ్రామీణ ప్రాంతాల్లోనే సులభంగా పరీక్షలు చేయవచ్చు. ఈ పరికరం లేజర్ గ్రాఫేన్ సాంకేతికత మరియు అధునాతన ఎలక్ట్రోకెమికల్ సెన్సార్లపై ఆధారపడి పని చేస్తుంది. దీని ద్వారా శరీరంలోని మూడు ముఖ్యమైన బయోమార్కర్లు - క్రియాటినైన్, యూరియా మరియు యూరిక్ యాసిడ్ - స్థాయిలను ఖచ్చితంగా కొలవవచ్చు. పరికరాన్ని స్మార్ట్ఫోన్తో అనుసంధానం చేసి, ప్రత్యేక బ్రౌజర్ అప్లికేషన్ ద్వారా ఫలితాలను తక్షణం తెలుసుకోవచ్చు. ఇది రోగులకు మాత్రమే కాకుండా, వైద్యులకు కూడా రియల్-టైమ్ డయాగ్నోసిస్లో సహాయం చేస్తుంది. బిట్స్ హైదరాబాద్ క్యాంపస్కు చెందిన డాక్టర్ పార్వతి నాయర్, డాక్టర్ స్వయంశ్రీ, డాక్టర్ ఆర్.ఎన్. పొన్నాలగు, డాక్టర్ సంకేత్ గోయల్ తదితర ప్రొఫెసర్ల బృందం ఈ పరిశోధనకు నాయకత్వం వహించింది. సాధారణంగా కిడ్నీ సమస్యలను గుర్తించడానికి రక్తం లేదా మూత్ర నమూనాలు తీసి ల్యాబ్లలో పరీక్షించాల్సి వస్తుంది. దీనికి సమయం, ఖర్చు మరియు ప్రయాణం అవసరమవుతాయి. కానీ ఈ కొత్త గ్యాడ్జెట్ ఆ సమస్యలన్నింటినీ పరిష్కరిస్తుంది. ఇది చాలా చిన్నది, తేలికగా ఉండి ఎక్కడికైనా తీసుకెళ్లవచ్చు. పరిశోధకులు తమ ల్యాబ్లో ఈ పరికరాన్నిఅన్ని విధాలా పరీక్షించారు. ఫలితాలు అత్యంత ఖచ్చితమైనవిగా ఉన్నాయని వారు తెలిపారు. ఈ సంబంధిత అధ్యయనం ప్రతిష్టాత్మక అంతర్జాతీయ జర్నల్ 'సైన్స్ డైరెక్ట్'లో ప్రచురితమై ప్రపంచవ్యాప్తంగా శాస్త్రవేత్తల అభినందనలు అందుకుంది. ఈ ఆవిష్కరణ ముఖ్యంగా గ్రామీణ మరియు సబర్బన్ ప్రాంతాల్లో ఎక్కువ ప్రయోజనం చేకూరుస్తుంది. అక్కడ వైద్య సౌకర్యాలు పరిమితంగా ఉండటం వల్ల చాలా మంది కిడ్నీ సమస్యలు తీవ్రమైన దశకు చేరుకునే సమయానికి గుర్తింపు జరుగుతుంది. ఈ పరికరం ద్వారా త్వరిత నిర్ధారణ సాధ్యమవుతుంది. ప్రస్తుతం ఈ పరికరాన్ని మరింత మెరుగుపరచి క్లినికల్ ట్రయల్స్ పూర్తి చేసి వాణిజ్యీకరణ చేయడానికి బృందం కృషి చేస్తోంది.
ليست هناك تعليقات:
إرسال تعليق