ఆంధ్రప్రదేశ్ దేవాదాయ శాఖలో అసిస్టెంట్ కమిషనర్గా పనిచేస్తున్న కే శాంతిని ఏసీబీ అధికారులు అరెస్టు చేశారు. ఆమె ఆదాయానికి మించి భారీగా ఆస్తులు కూడబెట్టారనే పక్కా సమాచారంతో విజయవాడ ఏసీబీ బృందం గుంటూరు జిల్లాలోని తాడేపల్లి, ఉండవల్లి ప్రాంతాల్లో ఏకకాలంలో తనిఖీలు చేపట్టింది. శాంతి నివాసంతో పాటు ఆమెకు సంబంధమున్న నాలుగు చోట్ల సోదాలు జరిగాయి. ఈ తనిఖీల్లో అధికారులకు కళ్లు చెదిరే స్థాయిలో అక్రమ ఆస్తుల పత్రాలు దొరికినట్లు సమాచారం. ప్రభుత్వ ఉద్యోగిగా ఉంటూ అక్రమ మార్గాల్లో సంపాదించినందుకు ఆమెపై కేసు నమోదు చేశారు. శాంతి నివాసంలో జరిపిన సోదాల్లో భారీగా నగదు, బంగారం మరియు స్థిరాస్తుల పత్రాలను అధికారులు స్వాధీనం చేసుకున్నారు. వీటిలో విశాఖపట్నంలో ఒక ఖరీదైన ఫ్లాట్, తాడేపల్లిలో మూడు అంతస్తుల భవనం ఉన్నట్లు గుర్తించారు. అలాగే సుమారు 770 గ్రాముల బంగారు ఆభరణాలు, మూడు కిలోల వెండి మరియు లక్షల్లో నగదును సీజ్ చేశారు. బ్యాంకు ఖాతాల్లో ఉన్న నిల్వలతో పాటు ఒక కారు, ద్విచక్ర వాహనం మరియు విలువైన ఎలక్ట్రానిక్ వస్తువులను ఏసీబీ జాబితాలో చేర్చింది. ఈ ఆస్తులన్నీ ఆమె సంపాదనకు మించి ఉన్నాయని నిర్ధారించిన అధికారులు, ఆమెను విజయవాడలోని ఏసీబీ ప్రత్యేక కోర్టులో ప్రవేశపెట్టేందుకు సిద్ధమయ్యారు. శాంతి గత కొంతకాలంగా వరుస వివాదాల్లో చిక్కుకుని సస్పెన్షన్లో ఉన్నారు. 2020లో బాధ్యతలు చేపట్టిన ఆమెపై గతంలోనే అనేక ఫిర్యాదులు రావడంతో ప్రభుత్వం చర్యలు తీసుకుంది. ముఖ్యంగా ఆమె భర్త మదన్ మోహన్ గతంలోనే తన భార్యపై మరియు ఒక రాజకీయ నేతపై సంచలన ఆరోపణలు చేశారు. అక్రమ భూ లావాదేవీల వల్ల తనకు అన్యాయం జరిగిందని ఆయన అప్పట్లో ఉన్నతాధికారులకు విన్నవించారు. ప్రస్తుతం మార్చి 2026 వరకు సస్పెన్షన్లో ఉన్న శాంతి, కొత్త పోస్టింగ్ కోసం ఎదురుచూస్తున్న సమయంలోనే ఏసీబీ అధికారులు ఆమెను అరెస్టు చేయడం చర్చనీయాంశంగా మారింది.
ليست هناك تعليقات:
إرسال تعليق