కొలంబోలో చిన్న పిల్లల క్యాన్సర్ ఆసుపత్రికి సేకరించిన విరాళాలను దుర్వినియోగం చేశారన్న ఆరోపణలతో శ్రీలంక మాజీ అధ్యక్షుడు మహీంద రాజపక్స సతీమణి శిరంతి రాజపక్సను (73) దేశ అవినీతి నిరోధక విభాగం బుధవారం అరెస్ట్ చేసింది. అనుర కుమార దిసనాయకే ప్రభుత్వం అధికారంలోకి వచ్చిన తర్వాత, దాదాపు రెండు దశాబ్దాల పాటు దేశాన్ని శాసించిన శక్తివంతమైన రాజపక్స కుటుంబంపై ఉన్న పాత అవినీతి కేసులను మళ్లీ వేగవంతం చేసింది. కొలంబోలోని నివాసంలో శిరంతిని అదుపులోకి తీసుకున్న అధికారులు, తదుపరి విచారణ నిమిత్తం లంచం మరియు అవినీతి ఆరోపణల విచారణ కమిషన్ ప్రధాన కార్యాలయానికి తరలించారు. అనంతరం బెయిల్ పిటిషన్‌పై నిర్ణయం కోసం ఆమెను న్యాయస్థానంలో హాజరుపరచనున్నారు. ఈ అరెస్టుతో పాటు నిబంధనలకు విరుద్ధంగా ఆమె ఫౌండేషన్‌కు రూ.10 మిలియన్ల (శ్రీలంక రూపాయలు - సుమారు $30,000) ప్రభుత్వ నిధులను మళ్లించిన కేసులో నేషనల్ సేవింగ్స్ బ్యాంక్ మాజీ ఛైర్మన్ ప్రదీప్ కరియవాసమ్‌ను కూడా అధికారులు అరెస్ట్ చేశారు. శిరంతి రాజపక్స ఆధ్వర్యంలో నడిచే 'సిరిలియ సవియ' ఫౌండేషన్ చిన్న పిల్లల క్యాన్సర్ ఆసుపత్రి కోసం పీఈటీ స్కానర్ కొనుగోలు చేస్తామంటూ పెద్ద ఎత్తున విరాళాలు సేకరించింది. అయితే, ఆ స్కానర్‌ను ఇప్పటికే చైనా ప్రభుత్వం ఉచితంగా విరాళంగా ఇచ్చిందని, అయినప్పటికీ ఆమె సంస్థ ప్రజల నుంచి విరాళాలు వసూలు చేసి ఆ సొమ్మును దుర్వినియోగం చేసిందని దర్యాప్తు సంస్థలు కోర్టుకు వెల్లడించాయి. వైద్య చికిత్స కోసం సింగపూర్ వెళ్లిన శిరంతి, కొలంబో తిరిగి రాగానే విచారణకు హాజరుకావాలంటూ గతంలోనే సమన్లు జారీ అయ్యాయి. అరెస్ట్ నుంచి ముందస్తు బెయిల్ పిటిషన్ విచారణకు రాకముందే అధికారులు ఆమెను అదుపులోకి తీసుకున్నారు. ఈ ఆరోపణలను శిరంతి న్యాయవాది మనోజ్ గమగే ఖండించారు. ఎలాంటి నిధులు దుర్వినియోగం కాలేదని, న్యాయపోరాటం చేస్తామని తెలిపారు. ఇప్పటికే ఆమె పెద్ద కుమారుడు, విపక్ష ఎంపీ నమల్ రాజపక్స 2013 ఎయిర్‌బస్ విమానాల కొనుగోలు కుంభకోణం కేసులో రిమాండ్ కస్టడీలో ఉన్నారు. తమ కుటుంబంపై రాజకీయ కక్షసాధింపుతోనే కేసులు బనాయిస్తున్నారని రాజపక్స వర్గం ఆరోపిస్తోంది.
No comments:
Post a Comment