దేశంలోని అన్ని ప్రభుత్వ రంగ బ్యాంకులు, ప్రాంతీయ గ్రామీణ బ్యాంకులు వచ్చే ఆదివారం యథావిధిగా పనిచేస్తాయని కేంద్ర ఆర్థిక మంత్రిత్వ శాఖ స్పష్టం చేసింది. ఖాతాదారుల ప్రయోజనాలను దృష్టిలో ఉంచుకుని అన్ని శాఖలు, ఏటీఎం అనుసంధాన విభాగాలు, కరెన్సీ చెస్ట్లు సాధారణ పనిదినంలా పనిచేసేందుకు రిజర్వ్ బ్యాంక్ ఆఫ్ ఇండియా ప్రత్యేక అనుమతినిచ్చింది. బ్యాంకింగ్ రంగంలో దాదాపు 90 శాతం ఉద్యోగులకు ప్రాతినిధ్యం వహిస్తున్న యునైటెడ్ ఫోరమ్ ఆఫ్ బ్యాంక్ యూనియన్స్ సెప్టెంబర్ 28 నుంచి 30 వరకు 3 రోజుల పాటు దేశవ్యాప్త సమ్మెకు పిలుపునిచ్చింది. వీకెండ్ సెలవులైన సెప్టెంబర్ 26 (నాల్గవ శనివారం), సెప్టెంబర్ 27 (ఆదివారం) తో పాటు ఈ సమ్మె తోడైతే సుదీర్ఘ కాలం పాటు సేవలకు అంతరాయం కలుగుతుందని ప్రభుత్వం ఈ ముందస్తు నిర్ణయం తీసుకుంది. అంతేకాకుండా, సెప్టెంబర్ 30వ తేదీ బ్యాంకుల అర్ధవార్షిక ఖాతాల ముగింపు సమయం కావడంతో ఖాతాదారుల లావాదేవీలు నిలిచిపోకుండా ప్రభుత్వం ఆదివారాన్ని పనిదినంగా ప్రకటించింది. వారానికి ఐదు రోజుల పనిదినాలను తక్షణమే అమలు చేయాలన్నది యునైటెడ్ ఫోరమ్ ఆఫ్ బ్యాంక్ యూనియన్స్ ప్రధాన డిమాండ్. దీంతో పాటు పాత పెన్షన్ విధానం ఎంపికను పునరుద్ధరించడం, పెన్షన్ల అప్డేట్, అందరు పెన్షనర్లకు ఏకరూప కరువు భత్యం ఫార్ములాను వర్తింపజేయాలని డిమాండ్ చేస్తున్నారు. సమ్మె పిలుపును విరమించుకోవాలని కేంద్ర ప్రభుత్వం, బ్యాంకు యాజమాన్యాలు యూనియన్లకు విజ్ఞప్తి చేస్తున్నప్పటికీ, ముందస్తు జాగ్రత్తగా లావాదేవీలు ఉన్నవారు ఆదివారమే పనులు పూర్తి చేసుకోవాలని అధికారులు సూచించారు. సమ్మె జరిగితే మొబైల్ బ్యాంకింగ్, నెట్ బ్యాంకింగ్, యూపీఐ, ఏటీఎంల వంటి డిజిటల్ సేవలను ఉపయోగించుకోవాలని బ్యాంకులు తమ వినియోగదారులకు సూచించాయి.
ليست هناك تعليقات:
إرسال تعليق