లైవ్ ఇంటర్వ్యూలో యాంకర్‌పై తీవ్ర అసహనం వ్యక్తం చేసి, మైక్ విసిరేసి వెళ్లిపోయిన డొనాల్డ్ ట్రంప్

ప్రముఖ అంతర్జాతీయ సంస్థ 'ఎన్‌బీసీ' నిర్వహించిన 'మీట్ ది ప్రెస్' కార్యక్రమంలో పాల్గొన్న డొనాల్డ్ ట్రంప్ లైవ్ ఇంటర్వ్యూ మధ్యలోనే యాంకర్‌పై తీవ్ర అసహనం వ్యక్తం చేస్తూ స్టూడియో నుంచి వాకౌట్ చేశారు. ఎన్నికల అక్రమాలకు సంబంధించిన ఆధారాల గురించి యాంకర్ గట్టిగా నిలదీయడమే ఈ ఆగ్రహానికి కారణమైంది. వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.  ఇంటర్వ్యూ ప్రారంభంలో అంతర్జాతీయ అంశాలు, ఇరాన్‌తో ముడిపడిన దౌత్యపరమైన వ్యూహాలపై చర్చ నడిచింది. ఆ తర్వాత డొనాల్డ్ ట్రంప్ ప్రతిపాదించిన 1.8 బిలియన్ డాలర్ల యాంటీ-వెపనైజేషన్ కార్యక్రమం గురించి యాంకర్ క్రిస్టెన్ వెల్కర్ ప్రశ్నించారు. ఈ క్రమంలో డొనాల్డ్ ట్రంప్ మాజీ అధ్యక్షుడు జో బైడెన్, అమెరికన్ మీడియాపై తీవ్రస్థాయిలో విమర్శలు గుప్పించారు. గత ప్రభుత్వ హయాంలో రాజకీయ కారణాల వల్ల ఎంతో మంది అమాయకులను వేధించి జైలుకు పంపారని ట్రంప్ ఆరోపించారు. చర్చ కాస్తా ఎన్నికల అక్రమాల వైపు మళ్లడంతో 2020 ఎన్నికల్లో భారీగా అక్రమాలు జరిగాయని, ప్రస్తుతం కాలిఫోర్నియాలోనూ అదే జరుగుతోందని డొనాల్డ్ ట్రంప్ వ్యాఖ్యానించారు. కాలిఫోర్నియాలో ఓట్ల లెక్కింపు ఆలస్యం కావడంపై ఆయన అనుమానం వ్యక్తం చేశారు. అయితే కాలిఫోర్నియా రాష్ట్ర నిబంధనల ప్రకారం పోస్టల్ బ్యాలెట్ల లెక్కింపు కారణంగానే సమయం పడుతుందని యాంకర్ స్పష్టం చేశారు. దీనిని అంగీకరించిన డొనాల్డ్ ట్రంప్, ఎన్నికల్లో మోసం చేయడం కోసమే అలా చేస్తున్నారని మండిపడ్డారు. ఈ క్రమంలో  "మీ వద్ద దీనికి సంబంధించి ఏదైనా గట్టి ఆధారం ఉందా?" అని యాంకర్ క్రిస్టెన్ వెల్కర్ ప్రశ్నించగా, "నేను కేవలం చూడటం, ప్రజలు చెప్పేది వినడం మాత్రమే చేస్తున్నాను, అదే నాకు చాలు" అంటూ ట్రంప్ దాటవేసే ప్రయత్నం చేశారు. యాంకర్ ప్రశ్నలతో విసిగిపోయిన డొనాల్డ్ ట్రంప్ అమెరికన్ మీడియాను 'అత్యంత అవినీతిమయమైనది'గా అభివర్ణించారు. ఎన్బీసీ, ఏబీసీ, సీబీఎస్,సీఎన్ఎన్ వంటి నెట్‌వర్క్‌లన్నీ ఏకపక్షంగా, పక్షపాత ధోరణితో వ్యవహరిస్తున్నాయని మండిపడ్డారు. తాను నిష్పక్షపాతంగానే ఉన్నానని యాంకర్ చెప్పినప్పటికీ.. "నువ్వు కూడా అవినీతిపరురాలివి లేదా నీకు కనీస అవగాహన అయినా లేదు" అంటూ ట్రంప్ మండిపడ్డారు. యాంకర్ క్రిస్టెన్ వెల్కర్‌తో జరిగిన తీవ్రమైన వాగ్వాదం తర్వాత ట్రంప్ ఇంటర్వ్యూను అక్కడితో ముగించాలని నిర్ణయించుకున్నారు. "నేను మీకు చాలా సమయం ఇచ్చాను. మీ మీడియా తీరు మార్చుకోవాలి. అవినీతి ప్రెస్‌తో ఏ దేశమూ గొప్పది కాలేదు" అని చెబుతూ, తన మైక్రోఫోన్‌ను తీసివేసి ఇంటర్వ్యూ మధ్యలోనే స్టూడియో నుంచి బయటకు నడిచారు. యాంకర్ ఆయనను ఆపడానికి ప్రయత్నించినప్పటికీ ట్రంప్ వెనక్కి తిరిగి చూడకుండా వెళ్ళిపోయారు.