అమెరికాలోని ప్రముఖ గాయనీమణులు ట్రంప్ ప్రభుత్వంపై తిరుగుబాటు బావుటా ఎగురవేశారు. యుద్ధాన్ని గ్లామరైజ్ చేస్తూ, హింసను ప్రేరేపించే వీడియోలకు తమ పాటను వాడుకోవడంపై పాప్ స్టార్ కేశాతో పాటు పలువురు దిగ్గజ కళాకారులు తీవ్ర ఆగ్రహం వ్యక్తం చేస్తున్నారు. శ్వేతసౌధం అనుసరిస్తున్న తీరు అమానవీయంగా ఉందంటూ సోషల్ మీడియా వేదికగా యుద్ధం ప్రకటించారు. పశ్చిమ ఆసియాలో ఉద్రిక్తతలు గరిష్ట స్థాయికి చేరిన తరుణంలో, అమెరికా శ్వేతసౌధం తన అధికారిక టిక్టాక్ ఖాతాలో ఒక యుద్ధ విమానం క్షిపణిని పేల్చుతున్న వీడియోను పోస్ట్ చేసింది. ఈ వీడియోకు కేశా పాడిన హిట్ సాంగ్ "Blow" ను బ్యాక్గ్రౌండ్ మ్యూజిక్గా వాడటం సంచలనంగా మారింది. సుమారు 1.45 కోట్ల వీక్షణలు పొందిన ఈ వీడియోపై కేశా సోమవారం నిప్పులు చెరిగారు. "నా పాటను హింసను ప్రోత్సహించడానికి, యుద్ధాన్ని బెదిరించడానికి వాడటం అసహ్యకరమైనది. యుద్ధాన్ని ఇంత తేలికగా తీసుకోవడం అమానవీయం" అంటూ ఆమె తీవ్రంగా ఖండించారు. కేశా తన ఆగ్రహాన్ని కేవలం సంగీతానికే పరిమితం చేయకుండా, డోనాల్డ్ ట్రంప్ వ్యక్తిగత రికార్డులపై కూడా విమర్శలు గుప్పించారు. వివాదాస్పద ఎప్స్టీన్ ఫైల్స్లో ట్రంప్ పేరు అనేకసార్లు ప్రస్తావనకు వచ్చిందనే వాస్తవం నుండి ప్రజల దృష్టిని మళ్లించడానికే ఇటువంటి యుద్ధ వీడియోలను వాడుతున్నారని ఆమె ఆరోపించారు. "ప్రేమ ఎప్పుడూ ద్వేషాన్ని అధిగమిస్తుంది, మానవ జీవితం పట్ల ఈ నిర్లక్ష్యం నేను విశ్వసించే విలువలకే విరుద్ధం" అని ఆమె స్పష్టం చేశారు. కేశా విమర్శలపై శ్వేతసౌధ కమ్యూనికేషన్స్ డైరెక్టర్ స్టీవెన్ చియాంగ్ అత్యంత వ్యంగ్యంగా స్పందించారు. గాయకులందరూ ఈ వివాదాల్లోకి దిగడం వల్ల తమ వీడియోలకు మరింత పబ్లిసిటీ వస్తోందని ఆయన ఎద్దేవా చేశారు. "ప్రజలు అసలు వీరు దేని గురించి ఫిర్యాదు చేస్తున్నారో చూడాలనుకుంటున్నారు, తద్వారా మా వీడియోలకు వ్యూస్ పెరుగుతున్నాయి.. మీ దృష్టికి ధన్యవాదాలు" అంటూ ఆయన ఎక్స్ (X) లో పోస్ట్ చేయడం చర్చనీయాంశమైంది.
ليست هناك تعليقات:
إرسال تعليق