శంషాబాద్‌లోని రాజీవ్ గాంధీ అంతర్జాతీయ విమానాశ్రయంలో ఢిల్లీ నుంచి చెన్నై వెళ్తున్న ఇండిగో విమానంలో సడన్‌గా సాంకేతిక విపత్తు ఎదురవడంతో అత్యవసరంగా ల్యాండ్ చేశారు. ఢిల్లీ నుంచి చెన్నై బయలుదేరిన ఇండిగో విమానం (6E 6115) ఆకాశంలో ప్రయాణిస్తుండగా, ఓ ప్రయాణికుడి వద్ద ఉన్న పవర్ బ్యాంక్‌లో ఒక్కసారిగా మంటలు చెలరేగాయి. క్యాబిన్ నుంచి పొగలు రావడం గమనించిన విమాన సిబ్బంది క్షణాల్లో అప్రమత్తమయ్యారు. వెంటనే విమానంలో అందుబాటులో ఉన్న అగ్నిమాపక పరికరాలు ఉపయోగించి మంటలను త్వరితగతిన ఆర్పేశారు. విమానంలో ప్రయాణికుల భద్రతను దృష్టిలో ఉంచుకుని పైలట్లు వెంటనే ఎయిర్ ట్రాఫిక్ కంట్రోల్ ని సంప్రదించి, అత్యవసర ల్యాండింగ్‌కు అనుమతి కోరారు. అనంతరం చెన్నై వెళ్లాల్సిన విమానాన్ని శంషాబాద్ ఎయిర్‌పోర్ట్‌కు దారిమళ్లించారు. రన్‌వేపై విమానం సురక్షితంగా ల్యాండ్ అవ్వడంతో ఎయిర్‌పోర్ట్ అధికారులు, ప్రయాణికులు ఊపిరి పీల్చుకున్నారు. విమానంలోని ప్రయాణికులందరూ పూర్తి క్షేమంగా ఉన్నారని, ఎవరికీ ఎలాంటి గాయాలు కాలేదని ఎయిర్‌పోర్ట్ యాజమాన్యం అధికారికంగా ధ్రువీకరించింది. ఈ ప్రమాద ఘటనపై శంషాబాద్ ఎయిర్‌పోర్ట్ భద్రతా సిబ్బంది , విమానయాన అధికారులు లోతుగా ఆరా తీస్తున్నారు. ప్రయాణికుడు వినియోగిస్తున్న పవర్ బ్యాంక్ ఏ కంపెనీకి చెందింది? అందులో మంటలు చెలరేగడానికి బ్యాటరీ శార్ట్ సర్క్యూటా లేక నాణ్యత లోపమా? అనే కోణంలో విచారణ చేపట్టారు. ప్రయాణికులను ప్రత్యామ్నాయ ఏర్పాట్ల ద్వారా వారి గమ్యస్థానానికి చేరవేసేందుకు ఇండిగో సంస్థ చర్యలు చేపట్టింది. విమానాల్లో ప్రయాణించేటప్పుడు ప్రమాదకరమైన ఎలక్ట్రానిక్ వస్తువులు, లిథియం బ్యాటరీల పట్ల అప్రమత్తంగా ఉండాలని అధికారులు విజ్ఞప్తి చేశారు.
No comments:
Post a Comment