భారత ప్రధాని నరేంద్ర మోడీ, ఇరాన్ అధ్యక్షుడు మసూద్ పెజెష్కియాన్ మధ్య జరిగిన ద్వైపాక్షిక చర్చల అనంతరం అమెరికా విదేశాంగ మంత్రి మార్కో రూబియో అత్యంత కీలక వ్యాఖ్యలు చేశారు. ఇరాన్ వైఖరి, అంతర్జాతీయ భద్రతా సవాళ్లను ప్రస్తావిస్తూ.. ప్రపంచంలోని ఏ దేశమూ ఇరాన్కు ప్రత్యక్షంగా కానీ, పరోక్షంగా కానీ సహాయం చేయకూడదని ఆయన స్పష్టం చేశారు. ఇరాన్పై అమల్లో ఉన్న అంతర్జాతీయ ఆంక్షలను ధిక్కరిస్తూ ఆ దేశానికి మద్దతుగా నిలిచే ఏ దేశమైనా కఠినమైన అమెరికా ఆంక్షలను ఎదుర్కోవాల్సి వస్తుందని ఆయన తీవ్రంగా హెచ్చరించారు. చాబహార్ పోర్ట్ అభివృద్ధి, ప్రాంతీయ వాణిజ్యం, ఇంధన భద్రత, మధ్య ఆసియాతో కనెక్టివిటీ పెంపొందించడం వంటి వ్యూహాత్మక అంశాలపై ప్రధాని నరేంద్ర మోదీ, ఇరాన్ అధ్యక్షుడు మసూద్ పెజెష్కియాన్ వివరంగా చర్చించారు. పశ్చిమాసియాలో ఉద్రిక్తతలు నెలకొన్న ప్రస్తుత తరుణంలో.. భారత్ తన జాతీయ ప్రయోజనాలకు అనుగుణంగా వ్యూహాత్మక ప్రాంతీయ సంబంధాలను బలోపేతం చేసుకునే దిశగా అడుగులు వేస్తోంది. ముఖ్యంగా చాబహార్ ఓడరేవు భారత్కు అఫ్గానిస్థాన్, సెంట్రల్ ఆసియా దేశాలకు చేరుకోవడానికి అత్యంత కీలకమైన మార్గంగా మారింది. ఈ ద్వైపాక్షిక సమావేశం పూర్తయిన కొద్దిసేపటికే అమెరికా తరఫున మార్కో రూబియో చేసిన ప్రకటన అంతర్జాతీయ రాజకీయాల్లో తీవ్ర చర్చకు దారితీసింది. ఇరాన్ తన వివాదాస్పద చర్యలు, క్షిపణి ప్రాజెక్టులు, ప్రాంతీయ ఆధిపత్య ప్రయత్నాలను వీడనంత వరకు ఆ దేశంతో ఆర్థిక, వాణిజ్య సంబంధాలు పెట్టుకోవడం అంతర్జాతీయ భద్రతకు విఘాతమని అమెరికా భావిస్తోంది. ఇరాన్కు ఆర్థిక ఊరట లభించేలా లేదా ఆంక్షల ప్రభావాన్ని తగ్గించేలా ఏ దేశమూ సహకరించకూడదని, నిబంధనలను ఉల్లంఘించే వర్గాలపై సెకండరీ ఆంక్షలు విధించేందుకు వెనకాడబోమని అమెరికా హెచ్చరించింది. అమెరికాతో అత్యంత బలమైన వ్యూహాత్మక బంధాన్ని కొనసాగిస్తూనే మరోవైపు తన ఇంధన, వాణిజ్య ప్రయోజనాల కోసం ఇరాన్తో సంబంధాలను కాపాడుకోవడం భారత్కు పెద్ద సవాలుగా మారింది. అమెరికా హెచ్చరికల నేపథ్యంలో భారత్ తన సార్వభౌమత్వ విదేశాంగ విధానాన్ని కొనసాగిస్తుందా లేదా ఆంక్షల నిబంధనలకు అనుగుణంగా అడుగులు వేస్తుందా అనేది ఇప్పుడు ఆసక్తికరంగా మారింది. ప్రపంచ భౌగోళిక రాజకీయాల్లో నెలకొన్న ఈ ఉత్కంఠ వాతావరణం రాబోయే రోజుల్లో ఆసియా వాణిజ్య సమీకరణాలను ప్రభావితం చేసే అవకాశం ఉంది.
إرسال تعليق