రాజస్థాన్లోని ధోల్పూర్ జిల్లా సరమథుర ప్రాంతంలోని ఆంగై పోలీస్ స్టేషన్ పరిధిలోని ధోధ్-బిర్జా గ్రామం సమీపంలో చెరువులో మునిగి ముగ్గురు మహిళలు, ఒక బాలుడు మృతి చెందినట్లు పోలీసులు తెలిపారు. సంఘటనాస్థలానికి చేరుకుని పోలీసులు దర్యాప్తు చేపట్టారు. పోలీసులు, స్థానికులు తెలిపిన వివరాల ప్రకారం.. ధోల్పూర్లోని మొరోలీ గ్రామానికి చెందిన కొందరు మహిళలు, కుటుంబ సభ్యులతో కలిసి బిర్జా గ్రామంలోని హిరామన్ బాబా ఆలయానికి పూజల కోసం వెళ్లారు. ఆలయ దర్శనం అనంతరం చెరువు వద్దకు వెళ్లిన సమయంలో ఓ బాలుడు ప్రమాదవశాత్తు నీటిలోకి జారిపడిపోయాడు. బాలుడు నీటిలో మునిగిపోతుండటాన్ని గమనించిన ముగ్గురు మహిళలు అతడిని రక్షించేందుకు చెరువులోకి దిగారు. అయితే నీటి లోతు, పరిస్థితుల కారణంగా వారు కూడా అదుపుతప్పి నీటిలో మునిగిపోయారు. క్షణాల్లోనే పరిస్థితి విషాదంగా మారింది. బాలుడితో పాటు ముగ్గురు మహిళలు నీట మునిగారు. సమాచారం అందుకున్న వెంటనే ఆంగై పోలీసులు సంఘటనా స్థలానికి చేరుకున్నారు. స్థానికుల సహకారంతో సహాయక చర్యలు ప్రారంభించారు. రెస్క్యూ బృందాలు చెరువులో గాలింపు చేపట్టి ముగ్గురు మహిళల మృతదేహాలను వెలికితీశాయి. మరోవైపు బాలుడి మృతదేహం కోసం గాలింపు చర్యలు కొనసాగుతున్నట్లు అధికారులు వెల్లడించారు. మృతులను మొరోలీ గ్రామానికి చెందిన వారుగా గుర్తించారు. ఘటన విషయం తెలియడంతో పెద్ద సంఖ్యలో గ్రామస్తులు చెరువు వద్దకు చేరుకున్నారు.
ليست هناك تعليقات:
إرسال تعليق