అమెరికాకు చెందిన ప్రముఖ మీడియా సంస్థ న్యూయార్క్ టైమ్స్ ప్రచురించిన ఓ కథనంపై భారత్ తీవ్ర అభ్యంతరం వ్యక్తం చేసింది. పాక్ ఆక్రమిత కశ్మీర్లో జరుగుతున్న పరిణామాలను "పాకిస్థాన్ కశ్మీర్"గా పేర్కొనడాన్ని భారత ప్రభుత్వం తప్పుదారి పట్టించే వ్యాఖ్యగా అభివర్ణించింది. న్యూయార్క్ టైమ్స్ తన కథనంలో "స్థానిక ఎన్నికలు ప్రారంభం కావడంతో పాకిస్థాన్ కశ్మీర్లో హింస చెలరేగింది" అనే భావంతో శీర్షిక ఇచ్చింది. దీనిపై స్పందించిన భారత రాయబార కార్యాలయం.. "పాకిస్థాన్ కశ్మీర్ అనే భౌగోళిక ప్రాంతం అసలు లేదు. అది చట్టవిరుద్ధంగా పాకిస్థాన్ ఆక్రమించిన భారత భూభాగం మాత్రమే" అని స్పష్టం చేసింది. జమ్మూ-కశ్మీర్, లద్దాఖ్ కేంద్రపాలిత ప్రాంతాలు భారతదేశంలో అంతర్భాగమని, వాటిలోని కొన్ని ప్రాంతాలను పాకిస్థాన్ అక్రమంగా ఆక్రమించి ఉంచిందని పేర్కొంది. పాక్ ఆక్రమిత కశ్మీర్లో జరుగుతున్న శాసనసభ ఎన్నికల నేపథ్యంలో పరిస్థితులు ఉద్రిక్తంగా మారాయి. ఎన్నికలను వ్యతిరేకిస్తూ నిరసనకారులు వీధుల్లోకి రావడంతో భద్రతా దళాలతో ఘర్షణలు చోటుచేసుకున్నాయి. ఈ ఘటనల్లో భద్రతా బలగాలు కాల్పులు జరపడంతో పలువురు ప్రాణాలు కోల్పోయినట్లు సమాచారం. స్థానిక మీడియా కథనాల ప్రకారం మరణాల సంఖ్య 40కు చేరినట్లు తెలుస్తోంది. పరిస్థితిని అదుపులోకి తీసుకురావడానికి అధికారులు పలు ప్రాంతాల్లో ఆంక్షలు అమలు చేస్తున్నారు. ఘర్షణల్లో మరణించిన వారి కుటుంబ సభ్యులు తీవ్ర ఆవేదన వ్యక్తం చేస్తున్నారు. తమ బంధువుల మృతదేహాలను భద్రతా బలగాలు అప్పగించడం లేదని వారు ఆరోపిస్తున్నారు. అంతేకాదు, పెద్దఎత్తున అంతిమయాత్రలు నిర్వహించకుండా అధికారులు ఆంక్షలు విధించినట్లు సమాచారం. దీంతో బాధిత కుటుంబాలు తీవ్ర నిరసన వ్యక్తం చేస్తున్నాయి. ఈ చర్యలు స్థానికంగా మరింత ఉద్రిక్తతకు దారితీస్తున్నాయని నివేదికలు చెబుతున్నాయి. పాక్ ఆక్రమిత కశ్మీర్లో ప్రజలు చాలా కాలంగా జీవన వ్యయం పెరగడం, పాలనలో పారదర్శకత లేకపోవడం, రాజకీయ వివక్ష, ప్రాథమిక సౌకర్యాల కొరత వంటి సమస్యలపై ఆందోళన వ్యక్తం చేస్తున్నారు. ఈ ఉద్యమాలకు జాయింట్ అవామీ యాక్షన్ కమిటీ నాయకత్వం వహిస్తోంది. ప్రజల డిమాండ్లను పరిష్కరించకుండా అణిచివేత చర్యలకు పాల్పడుతున్నారని నిరసనకారులు ఆరోపిస్తున్నారు. పాక్ ఆక్రమిత కశ్మీర్లో నిర్వహిస్తున్న ఎన్నికలను భారత్ గతంలోనే తిరస్కరించింది. భారత విదేశాంగ శాఖ ప్రకారం, అక్రమంగా ఆక్రమించిన భారత భూభాగంలో ఎన్నికలు నిర్వహించడం ద్వారా వాస్తవ పరిస్థితులను మార్చలేరు. అలాగే, ఆ ప్రాంతంలో జరుగుతున్న మానవ హక్కుల ఉల్లంఘనల నుంచి ప్రపంచ దృష్టిని మళ్లించేందుకు పాకిస్థాన్ ఇటువంటి చర్యలకు పాల్పడుతోందని భారత్ ఆరోపించింది. పాక్ ఆక్రమిత కశ్మీర్పై భారత సార్వభౌమాధికారం ఎప్పటికీ యథాతథంగానే ఉంటుందని మరోసారి స్పష్టం చేసింది.
ليست هناك تعليقات:
إرسال تعليق