అమెరికా సౌత్ కరోలినాలోని బీఎండబ్ల్యూ క్యాంపస్లోని రసాయన పారిశ్రామిక సేవల దిగ్గజం 'యూనివార్ సొల్యూషన్స్' జూన్ 28 నాటికి 99 మంది ఉద్యోగులను శాశ్వతంగా తొలగిస్తున్నట్లు ప్రకటించింది. ఈ లేఆఫ్స్ వెనుక అసలు కారణం బీఎండబ్ల్యూ కార్ల ఉత్పత్తి తగ్గడం కాదు. అక్కడ జరుగుతున్న అంతర్గత నిర్వహణ మార్పులని తేలింది. వాస్తవానికి బీఎండబ్ల్యూ గ్రీర్ ప్లాంట్లో యూనివార్ సొల్యూషన్స్ వేస్ట్ మేనేజ్మెంట్ సేవలను అందిస్తోంది. ఈ సేవలను అక్కడితో నిలిపివేయాలని కంపెనీ నిర్ణయించుకోవడంతో.. ఆ విభాగంలో పనిచేస్తున్న 99 మంది కార్మికులు తమ ఉద్యోగాలను కోల్పోవాల్సి వస్తోంది. ఏప్రిల్ 27న దాఖలు చేసిన ఈ లేఆఫ్ నోటీసు.. ఆటోమొబైల్ సప్లై చైన్ నెట్వర్క్లో కాంట్రాక్టు మార్పులు ఎంతటి ప్రభావం చూపుతాయో మరోసారి నిరూపించింది. దాదాపు 10 మిలియన్ చదరపు అడుగుల విస్తీర్ణంలో.. 12వేల మంది ఉద్యోగులతో కళకళలాడే బీఎండబ్ల్యూ క్యాంపస్ అమెరికాలోనే అతిపెద్ద ఆటో ఎగుమతి కేంద్రంగా గుర్తింపు పొందింది. గత ఏడాది దాదాపు 9.8 బిలియన్ డాలర్ల విలువైన వాహనాలను ఇక్కడి నుండి ఎగుమతి చేశారు. ఇంతటి భారీ పారిశ్రామిక వ్యవస్థలో లాజిస్టిక్స్, మెయింటెనెన్స్, వ్యర్థాల నిర్వహణ వంటి పనుల కోసం థర్డ్ పార్టీ సంస్థలపై ఆధారపడటం సహజం. దీని ప్రభావం బీఎండబ్ల్యూ ఉత్పత్తిపై నేరుగా చూపకపోయినా, స్థానిక ఆర్థిక వ్యవస్థలో మాత్రం చిన్నపాటి కుదుపుకు కారణమైంది. సాధారణంగా ఇలాంటి భారీ ప్లాంట్లు కాంట్రాక్టులను మార్చినప్పుడు లేదా సేవలను తగ్గించుకున్నప్పుడు శ్రామిక శక్తిలో ఇటువంటి మార్పులు వస్తుంటాయి. జూన్ నెలాఖరు కల్లా ఈ ప్రక్రియ పూర్తి కానుంది. ఏది ఏమైనా.. ప్రపంచ ప్రఖ్యాతి గాంచిన కార్ల తయారీ కేంద్రంలో వంద మందికి పైగా సిబ్బంది ఇంటికి వెళ్లాల్సి రావడం ఆ ప్రాంతంలోని ఆటోమోటివ్ సప్లై చైన్ వర్గాల్లో కలకలం రేపుతోంది.
ليست هناك تعليقات:
إرسال تعليق