ఆంధ్రప్రదేశ్ లోని ఒంగోలు గద్దలగుంట ప్రాంతంలో మనస్పర్థల కారణంగా తన తల్లిని ఇంట్లో బంధించి నిప్పు పెట్టడంతో, ఆమె మంటల్లో చిక్కుకుని సజీవ దహనమైంది. నిందితుడు తన తల్లితో కొంతకాలంగా గొడవ పడుతున్నట్లు తెలుస్తోంది. మంగళవారం ఉదయం వీరిద్దరి మధ్య మాట మాట పెరగడంతో ఆవేశానికి గురైన కుమారుడు, తల్లిని గదిలో బంధించి నిప్పు అంటించాడు. మంటలు క్షణాల్లో ఇల్లంతా వ్యాపించాయి. లోపల ఉన్న వృద్ధురాలు కాపాడమని కేకలు వేసినప్పటికీ, నిందితుడు అడ్డుకోవడంతో ఆమె బయటకు రాలేకపోయింది. చూస్తుండగానే మంటలు తీవ్రరూపం దాల్చి ఆమె అక్కడికక్కడే మృతి చెందింది. ఇంటి నుంచి దట్టమైన పొగ, మంటలు రావడం గమనించిన ఇరుగుపొరుగు వారు వెంటనే అగ్నిమాపక కేంద్రానికి సమాచారం అందించారు. ఫైర్ సిబ్బంది హుటాహుటిన ఘటనా స్థలానికి చేరుకుని మంటలను అదుపులోకి తెచ్చారు. అయితే అప్పటికే ఆ వృద్ధురాలు పూర్తిగా కాలిపోయింది. పోలీసులు ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం ఒంగోలు రిమ్స్ ఆస్పత్రికి తరలించారు. ఈ దారుణానికి ఒడిగట్టిన కుమారుడిని పోలీసులు అదుపులోకి తీసుకుని విచారిస్తున్నారు. ఆస్తి తగాదాలే ఈ హత్యకు ప్రధాన కారణమని స్థానికులు అనుమానిస్తున్నారు. కేసు నమోదు చేసుకున్న పోలీసులు అన్ని కోణాల్లో దర్యాప్తు చేస్తున్నారు.
ليست هناك تعليقات:
إرسال تعليق