మహారాష్ట్ర కొల్హాపూర్లోని జ్యోతిబా ఆలయంలో సుమారు 15 నుంచి 20 మంది పూజారులు కొందరు భక్తులను చుట్టుముట్టి విచక్షణారహితంగా కొట్టిన వీడియో సోషల్ మీడియాలో వైరల్గా మారింది. బాధితులను పిడిగుద్దులు గుద్దడం, కాళ్లతో తన్నడమే కాకుండా కొబ్బరికాయలతోనూ పూజారులు దాడి చేయడం ఈ వీడియోలో కనిపించింది. స్థానికులు తెలిపిన వివరాల ప్రకారం ఆదివారం ఉదయం ప్రధాన హారతి సమయంలో కొందరు యువకులు ఆలయంలో గందరగోళం సృష్టించారు. పూజారులపై గులాల్ (రంగు) చల్లి, వారి టోపీలను కింద పడేశారు. వారిని వారించే క్రమంలో సహనం కోల్పోయిన పూజారులు ఆ యువకులను గుడి బయటకు లాక్కొచ్చి మరీ చితకబాదారు. కొందరు తప్పించుకుని పారిపోవడానికి ప్రయత్నించినా వదిలిపెట్టలేదు. ఈ ఘటనపై ఆలయ కమిటీ స్పందిస్తూ పూజారులకు మద్దతుగా నిలిచింది. పక్క ఊరి నుంచి మద్యం మత్తులో వచ్చిన సుమారు 100-200 మంది ఆకతాయిలు.. హారతిని అడ్డుకోవడమే కాకుండా, మహిళల పట్ల అసభ్యంగా ప్రవర్తించారని, వృద్ధ పూజారులను సైతం అవమానించారని ఆరోపించింది. పూజారులను అప్రతిష్టపాలు చేసేందుకే వీడియోను తప్పుగా ప్రచారం చేస్తున్నారని, బాధ్యులపై పోలీసులకు ఫిర్యాదు చేశామని స్పష్టం చేసింది. ప్రస్తుతం ఈ ఘటనపై పోలీసులు దర్యాప్తు చేస్తున్నారు.
ليست هناك تعليقات:
إرسال تعليق