బెంగాల్‌ ఈడీ అధికారులపై పోలీసులు నమోదు కేసు : ఎఫ్ఐఆర్ లను నిలిపివేస్తూ సుప్రీంకోర్టు స్టే

పశ్చిమ బెంగాల్‌లోని ఐ-ప్యాక్ కార్యాలయంపై ఈడీ నిర్వహించిన సోదాల్లో ముఖ్యమంత్రి మమతా బెనర్జీ స్వయంగా జోక్యం చేసుకున్నారన్న ఆరోపణలపై సుప్రీంకోర్టు కీలక విచారణ చేపట్టింది. ఈడీ దర్యాప్తును అడ్డుకోవడమే కాకుండా, స్వాధీనం చేసుకున్న కీలక పత్రాలను ముఖ్యమంత్రి స్వయంగా తీసుకెళ్లారని, ఇది దొంగతనం కిందికే వస్తుందని ఈడీ తరపు న్యాయవాదులు కోర్టుకు వివరించారు. ఈ పరిణామాలపై స్పందించిన ధర్మాసనం, ఈడీ అధికారులపై రాష్ట్ర పోలీసులు నమోదు చేసిన ఎఫ్ఐఆర్ లను నిలిపివేస్తూ సుప్రీంకోర్టు స్టే ఇచ్చింది. మరోవైపు, టీఎంసీ తరపు న్యాయవాదులు ఈ ఆరోపణలను తోసిపుచ్చారు. ఎన్నికల వ్యూహాలకు సంబంధించిన అత్యంత రహస్యమైన డేటాను దొంగిలించేందుకే ఎన్నికల ముందు ఈడీ ఈ దాడులు చేసిందని వారు వాదించారు. మమతా బెనర్జీ కేవలం పార్టీ అధ్యక్షురాలి హోదాలోనే అక్కడకు వెళ్లారని, తన నియోజకవర్గ అభివృద్ధి లేదా పార్టీ కార్యకలాపాలకు సంబంధించిన అంశాలను కాపాడే హక్కు ఆమెకు ఉందని పేర్కొన్నారు. ఈ కేసు ఇప్పటికే హైకోర్టులో ఉండగా సుప్రీంకోర్టులో విచారించడాన్ని వారు అభ్యంతరపెట్టారు. కేంద్ర దర్యాప్తు సంస్థల పనిలో రాష్ట్ర ప్రభుత్వాల జోక్యం తీవ్రమైన విషయమని సుప్రీంకోర్టు అభిప్రాయపడింది. రాజ్యాంగబద్ధమైన వ్యవస్థలు స్వతంత్రంగా పనిచేయాలని, నేరస్తులకు ఏ రాష్ట్రం కూడా రక్షణ కవచంలా మారకూడదని స్పష్టం చేసింది. సోదాలకు సంబంధించిన సీసీటీవీ ఫుటేజీని భద్రపరచాలని ఆదేశిస్తూ, దీనిపై సమగ్ర వివరణ ఇవ్వాలని పశ్చిమ బెంగాల్ ప్రభుత్వానికి నోటీసులు జారీ చేసింది. తదుపరి విచారణను మూడు రోజుల తర్వాత చేపడతామని కోర్టు వెల్లడించింది.