ఇరాన్ లోని టెహ్రాన్‌లో అణుశక్తి సంస్థను ఆదివారం అధ్యక్షుడు మసౌద్ పెజెష్కియాన్ సందర్శించారు. ఈ సందర్భంగా పెజెష్కియాన్ దేశ అణు శాస్త్రవేత్తలు, అధికారులతో సమావేశమయ్యారు. అనంతరం ఆయన మాట్లాడుతూ టెహ్రాన్ తన అణు సౌకర్యాలను పునర్నిర్మించుకుంటుందని, ఇంకా ఎక్కువ శక్తితో వాటిని తిరిగి నిర్మిస్తామని చెప్పారు. “ఎన్ని భవనాలు, కర్మాగారాలు ధ్వంసమైనా, మేము వాటిని పునర్నిర్మిస్తాము, ఈసారి మరింత బలంగా ఉంటాము” అని ఆయన వెల్లడించారు. ఇరాన్ అణు కార్యక్రమం ఆయుధాల కోసం కాదు, శక్తి, వైద్యం, మానవ అవసరాల కోసమేనని పెజెష్కియన్ పునరుద్ఘాటించారు. జూన్‌లో అమెరికా, ఇజ్రాయెల్ అనేక ఇరానియన్ అణు కేంద్రాలపై దాడి చేశాయి. దాడి అనంతరం అమెరికా మాట్లాడుతూ ఈ కేంద్రాలను అణ్వాయుధాలను అభివృద్ధి చేయడానికి ఉపయోగిస్తున్నారని పేర్కొంది. అయితే ఇరాన్ తన కార్యక్రమం పూర్తిగా శాంతియుతమని కొనసాగిస్తోందని చెప్పింది. అమెరికా – ఇజ్రాయెల్ దాడుల్లో అనేక మంది ఇరానియన్ శాస్త్రవేత్తలు, అధికారులు మరణించారు. ఈ దాడిలో యురేనియం సుసంపన్న కర్మాగారాలకు గణనీయమైన నష్టం వాటిల్లిందని పలు నివేదికలు పేర్కొన్నాయి. ఇరాన్ ఇజ్రాయెల్‌పై 500 కంటే ఎక్కువ బాలిస్టిక్ క్షిపణులు, 1,100 డ్రోన్‌లను ప్రయోగించింది. ఈ దాడిలో 32 మంది మరణించారు, 3,000 మందికి పైగా గాయపడ్డారు. ఇరాన్ ధ్వంసమైన తన అణు కేంద్రాలను తిరిగి ప్రారంభించడానికి ప్రయత్నిస్తే అమెరికా కొత్త దాడులను ప్రారంభిస్తుందని యూఎస్ అధ్యక్షుడు డొనాల్డ్ ట్రంప్ హెచ్చరించారు. ఇరాన్ విదేశాంగ మంత్రి అబ్బాస్ అరఘ్చి శనివారం మాట్లాడుతూ తమ దేశం అమెరికాతో ప్రత్యక్ష చర్చలు జరపదని, కానీ పరోక్ష చర్చలకు సిద్ధంగా ఉందని అన్నారు. “మా క్షిపణి కార్యక్రమంపై మేము ఎప్పటికీ చర్చలు జరపము” అని ఆయన అన్నారు. “ఏ వివేకవంతమైన దేశమూ తన రక్షణను వదులుకోదు. మేము యురేనియం సుసంపన్నతను ఆపము” అని ఆయన పేర్కొన్నారు. ఇరాన్ న్యాయమైన పరిష్కారానికి సిద్ధంగా ఉందని, కానీ అమెరికా షరతులను అంగీకరించదని అరాఘ్చి అన్నారు. ఐక్యరాజ్యసమితి జనరల్ అసెంబ్లీలో పెజెష్కియన్ మాట్లాడుతూ.. ఇరాన్ దురాక్రమణదారులకు ఎప్పటికీ లొంగదని పేర్కొన్నారు. అమెరికా, ఇజ్రాయెల్ వైమానిక దాడులను ఐక్యరాజ్యసమితి జనరల్ అసెంబ్లీ సాక్షిగా ఆయన ఖండించారు. ఇరాన్ దౌత్య చర్చల మార్గంలో ఉన్నప్పుడు అవి జరిగాయని ఆయన వెల్లడించారు.
ليست هناك تعليقات:
إرسال تعليق