తెలంగాణ మాజీ సీఎం కేసీఆర్ వియ్యంకుడు, ఎమ్మెల్సీ కవిత మామగారైన, బీఆర్ఎస్ సీనియర్ నేత రాంకిషన్ రావుపై నిజామాబాద్ లో ఎస్సీ, ఎస్టీ అట్రాసిటీ కేసు నమోదైంది. నిజామాబాద్ లో ఓ స్థల వివాదం విషయంలో గాధారి గోపి ఫిర్యాదు మేరకు నిజామాబాద్ రూరల్ పోలీసులు ఈ కేసు నమోదు చేశారు. ఈ మేరకు రాంకిషన్ రావుతోపాటు కొండూరు నగేష్, సూదం రవిలపై అట్రాసిటీ కేసు నమోదైంది. రూరల్ పోలీసు స్టేషన్ పరిధిలోని బైపాస్ రోడ్డులో ఉన్న ఆర్కేఆర్ అపార్ట్మెంట్ వద్ద 235 గజాల స్థలం విషయమై కొన్ని రోజులుగా వివాదం కొనసాగుతోంది. ఈ స్థలాన్ని కబ్జా చేసేందుకు రాంకిషన్ రావు, అతని అనుచరులు ప్రయత్నిస్తున్నారని, ఇదేంటని ప్రశ్నిస్తే బెదిరింపులకు దిగుతున్నారని అపార్ట్మెంట్ కు చెందిన గోపి అనే వ్యక్తి ఫిర్యాదు చేసినట్టు రూరల్ పోలీసు స్టేషన్ ఎస్సై ఎండీ ఆరీఫ్ తెలిపారు. ఈ స్థలం తమదని, తాము ఎలాంటి కబ్జా చేయలేదని కొండూరు నగేష్ తెలిపారు. ఈ వివాదంతో ఎమ్మెల్సీ కవిత మామ రాంకిషన్ రావుకు ఎలాంటి సంబంధం లేదన్నారు. అపార్ట్మెంట్ వాసుల్లో కొందరు తన స్థలాన్ని కబ్జా చేసేందుకు ప్రయత్నిస్తున్నారని అదే పోలీసు స్టేషన్ లో నగేష్ ఫిర్యాదు చేశారు.
ليست هناك تعليقات:
إرسال تعليق