చైనాలో డాలియన్ సిటీలోని ఎక్స్-రోబోస్ అనే హ్యూమనాయిడ్ రోబోల ఫ్యాక్టరీలో హ్యూమనాయిడ్ (మనుషుల్ని పోలిన) రోబోలకు అడ్వాన్స్డ్ వెర్షన్స్ ఇక్కడ రూపొందుతున్నాయి. మనుషుల్లా కనిపించడమే కాదు, మనలాగే భావోద్వేగాలను స్పష్టంగా చూపించగలవు. ఇప్పటికే మెడికల్, హాస్పిటాలిటీ తదితర రంగాల్లో వినియోగంలో ఉన్న మానవ రూప రోబోలలో ఈ రకానివి విప్లవాత్మక మార్పులకు తెరలేపబోతున్నాయి. ఈ ఫ్యాక్టరీలోకి వెళితే అచ్చం మనుషుల చర్మాన్ని పోలి సిలికాన్తో చేసిన చేతులు, కాళ్లు, ముఖాలు పదుల సంఖ్యలో కనిపిస్తాయి. అక్కడే సగం రూపుదిద్దుకున్న, పూర్తిగా రూపుదిద్దుకున్న రోబోలు, వాటి విడి భాగాలూ కనిపిస్తాయి. ఆడా మగా రూపాల్లో విభిన్న వయసుల్లో కనిపించే మర యంత్రాలుంటాయి ఇక్కడ. అన్ని హంగులూ పూర్తయిన ఓ రోబోతో ట్రయల్ రన్ చేస్తుంటారు. అక్కడ ఉద్యోగి నవ్వగానే అవతలి రోబో చక్కగా నవ్వుతుంది. అతను నాలుక కరచుకుంటే, అదీ అలాగే చేస్తుంది. కేవలం అనుకరించడమే కాదు, అవతలి వ్యక్తి ఏ సందర్భంలో అలా అంటున్నాడో అర్థం చేసుకుని మరీ ప్రతిస్పందించేందుకు కృత్రిమ మేధను వినియోగిస్తున్నారు. నవ్వడం, బాధ పడటం, ఆశ్చర్యం వ్యక్తం చేయడంలాంటి హావభావాలను ప్రదర్శించేందుకు ప్రత్యేక పోగ్రామింగ్తో పనిచేసే అనేక చిన్న మోటార్లను వీటి ముఖంలో అమరుస్తున్నారు. మనుషుల్ని పోలినవీ ఇందులో రూపొందుతున్నాయి. విద్య, వైద్య రంగాల్లో వీటి వినియోగానికి సంబంధించి అధ్యయనాలు జరుపుతున్నట్టు సంస్థ చెబుతున్నది. ముఖ్యంగా సైకాలజీ కౌన్సెలింగ్లు, తొలి దశలో మానసిక సమస్యల్ని అంచనా వేసి చికిత్స అందించడం లాంటి విషయాలను లోతుగా పరిశీలిస్తున్నట్టు తెలిపింది. ఇక, ఈ రకం హ్యూమనాయిడ్ రోబోను తయారు చేసేందుకు మోడల్ను, సంక్టిష్టతను బట్టి రెండు వారాల నుంచి నెల రోజుల వరకూ సమయం పడుతుందట!. కోటిన్నర నుంచి రెండు కోట్ల రూపాయల వరకూ ఇవి ఖరీదు చేస్తున్నాయి. ప్రస్తుతం ఆ దేశంలో వీటితో ఒక మ్యూజియాన్ని ఏర్పాటు చేశారట !.
ليست هناك تعليقات:
إرسال تعليق