చెన్నైలో జరిగిన మీడియా సమావేశంలో ఆంధ్రప్రదేశ్ కాంగ్రెస్ కమిటీ అధ్యక్షురాలు వైఎస్ షర్మిల మాట్లాడుతూ దేశంలో జరుగుతున్న పరిణామాలు, ప్రత్యేకించి ఓట్ల చోరీ అంశంపై తీవ్ర ఆందోళన వ్యక్తం చేశారు. తమిళనాడు ప్రజలందరూ ఈ కీలక అంశంపై గొంతు విప్పాలని ఆమె పిలుపునిచ్చారు. ప్రతి పౌరుడికి, ముఖ్యంగా సమాజంలోని అత్యంత పేదవారికి కూడా ఓటు హక్కు ఎంతో పవిత్రమైనదని, అది ప్రతి ఒక్కరి వ్యక్తిగత హక్కు అని వైఎస్ షర్మిల పేర్కొన్నారు. ఈ ఓటు హక్కు ద్వారానే భారతదేశం ఓ గొప్ప ప్రజాస్వామ్య దేశంగా నిలవగలిగిందని ఆమె గుర్తుచేశారు. ప్రస్తుతం ఎన్నికల సంఘం కొందరి కనుసన్నల్లో, నియంత్రణలో నడుస్తోందని షర్మిల ఆరోపణలు చేశారు. అందరు కమిషనర్ల ఏకాభిప్రాయం లేదా సమ్మతి లేకుండానే 14 కీలక ఉత్తర్వులు జారీ చేయడం నిరంకుశ ధోరణికి నిదర్శనమని ఆమె మండిపడ్డారు. ఈ నేపథ్యంలో ప్రధాన ఎన్నికల కమిషనర్ జ్ఞానేశ్ కుమార్ తక్షణమే తన పదవికి రాజీనామా చేయాలని కాంగ్రెస్ పార్టీ తరఫున డిమాండ్ చేస్తున్నట్లు వెల్లడించారు. దేశంలో రాజ్యాంగ విలువులను, ప్రజాస్వామ్య హక్కులను కాపాడుకోవడానికి పౌరులందరూ ఏకమై నిరసన తెలపాలని కాంగ్రెస్ పార్టీ కోరుతోందని షర్మిల తెలిపారు. అఖిల భారత కాంగ్రెస్ నాయకుడు రాహుల్ గాంధీ అడుగుజాడల్లో దేశ ప్రజల హక్కుల కోసం కాంగ్రెస్ పార్టీ తన పోరాటాన్ని నిరంతరం కొనసాగిస్తుందని వైఎస్ షర్మిల స్పష్టం చేశారు.
LATEST NEWS AP TO TG
QooQ
No comments:
Post a Comment