99వ ఆస్కార్ అవార్డుల బరిలో నిలిచేందుకు భారత్ తరపున అధికారిక ఎంట్రీ ఖరారైంది. ప్రతిష్టాత్మక 'ఉత్తమ అంతర్జాతీయ ఫీచర్ ఫిల్మ్' విభాగంలో ప్రాతినిధ్యం వహించేందుకు మరాఠీ థ్రిల్లర్ చిత్రం 'గోంధల్' ఎంపికైనట్లు ఫిల్మ్ ఫెడరేషన్ ఆఫ్ ఇండియా అధికారికంగా వెల్లడించింది. ఎన్నో భారీ బడ్జెట్, పాన్ ఇండియా చిత్రాలను వెనక్కి నెట్టి విభిన్నమైన కథాంశంతో తెరకెక్కిన ఈ మరాఠీ చిత్రం ఈ అరుదైన అవకాశాన్ని దక్కించుకోవడం విశేషం. ఆస్కార్ ఎంట్రీ కోసం ఈ ఏడాది దేశవ్యాప్తంగా వివిధ భాషలకు చెందిన మొత్తం 33 చిత్రాలు తీవ్రంగా పోటీ పడ్డాయి. ఫిల్మ్ ఫెడరేషన్ ఆఫ్ ఇండియా ఏర్పాటు చేసిన ప్రత్యేక జ్యూరీ ఈ చిత్రాలన్నింటినీ క్షుణ్ణంగా వీక్షించి, విశ్లేషించింది. ఈ జాబితాలో బాలీవుడ్ నుంచి అత్యధికంగా 14 సినిమాలు ఉండగా, మరాఠీ, తెలుగు, గుజరాతీ భాషల నుంచి నాలుగు చొప్పున చిత్రాలు పరిశీలనకు వచ్చాయి. తమిళం నుంచి మూడు, మలయాళం, నాగమీస్ భాషల నుంచి ఒక్కో సినిమా, వీటితో పాటు ఒక మూకీ చిత్రం కూడా బరిలో నిలిచాయి. టాలీవుడ్ నుంచి 'సింగ్ గీతం', 'పెద్ది', 'ఇరుముడి', ఇంకా విడుదల కావాల్సిన 'ఇగ్వా' చిత్రాలు కమిటీ స్క్రీనింగ్కు వెళ్లాయి. హిందీ నుంచి అగ్ర తారలు నటించిన '120 బహదూర్', 'బోర్డర్ 2', 'ధురంధర్', 'ధురంధర్: ది రివెంజ్', 'ఇక్కీస్' తో పాటు ఇటీవల బ్లాక్బస్టర్ విజయం సాధించిన 'హనుమాన్ అంశ్' లాంటి భారీ చిత్రాలను జ్యూరీ పరిశీలించింది. కానీ, ఈ కమర్షియల్ చిత్రాలన్నింటినీ పక్కనపెట్టి, అద్భుతమైన స్క్రీన్ ప్లే, కంటెంట్ ప్రధానంగా తెరకెక్కిన మరాఠీ థ్రిల్లర్ 'గోంధల్'కే జ్యూరీ సభ్యులు ఓటు వేశారు. ప్రాంతీయ సినిమాలు జాతీయ, అంతర్జాతీయ స్థాయిలో ఎలా సత్తా చాటుతున్నాయో ఈ ఎంపిక మరోసారి నిరూపించింది.
ليست هناك تعليقات:
إرسال تعليق