రేపు లోక్ సభ ముందుకు పేపర్ లీకేజీ బిల్లు ?

ధర్మేంద్ర ప్రధాన్ రాజీనామాతో రేపటి నుండి పార్లమెంట్ సాధారణ కార్యకలాపాలు పునఃప్రారంభమయ్యే అవకాశం ఉంది. భవిష్యత్తులో పోటీ పరీక్షలలో పేపర్ లీకేజీలను అరికట్టే చర్యలలో భాగంగా కేంద్ర ప్రభుత్వం 'పబ్లిక్ ఎగ్జామినేషన్స్ (ప్రివెన్షన్ ఆఫ్ అన్‌ఫెయిర్ మీన్స్) సవరణ బిల్లు, 2026'ని రేపు లోక్‌సభలో ప్రవేశపెట్టనుంది. ఈ సవరణ బిల్లులో పేపర్ లీకేజీలకు పాల్పడే వారిపై కఠినమైన శిక్షాత్మక నిబంధనలను పొందుపరిచారు. సైన్స్ అండ్ టెక్నాలజీ శాఖ మంత్రి జితేంద్ర సింగ్ ఈ బిల్లును ప్రవేశపెట్టనున్నారు.సోమవారం నాటి లోక్‌సభ అజెండా ప్రకారం ఈ బిల్లును సభలో ప్రవేశపెట్టిన తర్వాత ఆమోదం కోసం కూడా ప్రతిపాదించనున్నారు. లొసుగులను సరిదిద్దడానికి ప్రత్యేక న్యాయ వ్యవస్థలను ఏర్పాటు చేయడానికి మరియు క్రిమినల్ విచారణలను వేగవంతం చేయడానికి ఈ బిల్లు ద్వారా ఏడు కీలక సవరణలను తీసుకువస్తున్నారు. ఈ చట్టం కింద వచ్చే నేరాల విచారణ కోసం ప్రత్యేక ఫాస్ట్ ట్రాక్ కోర్టులుగా సెషన్స్ కోర్టులను నామినేట్ చేసే అధికారాన్ని రాష్ట్ర ప్రభుత్వాలు మరియు కేంద్రపాలిత ప్రాంతాల పాలనాయంత్రణలకు కల్పిస్తారు. ఫాస్ట్ ట్రాక్ కోర్టులలో విచారణ రోజూవారీ ప్రాతిపదికన జరగాలి. ఛార్జిషీట్ దాఖలైన తేదీ నుండి మూడు నెలల వ్యవధిలోనే విచారణ పూర్తి కావాలి. పెద్ద ఎత్తున లేదా అంతర్రాష్ట్ర స్థాయిలో జరిగే పరీక్షల అక్రమాలను విచారించడానికి ప్రత్యేక టాస్క్ ఫోర్స్‌ను ఏర్పాటు చేసే అధికారాన్ని కేంద్రం కలిగి ఉంటుంది. విచారణలో జాప్యాన్ని నివారించడానికి రెండు నెలల్లోపే దర్యాప్తు పూర్తి చేయాల్సి ఉంటుంది. ఆర్గనైజ్డ్ పేపర్ లీకేజీలకు పాల్పడిన వ్యక్తులు, కోచింగ్ సెంటర్లు మరియు సర్వీస్ ప్రొవైడర్లకు కఠినమైన జైలు శిక్ష మరియు భారీ జరిమానాలను బిల్లు ప్రతిపాదిస్తోంది. వర్షాకాల సమావేశాల మొదటి వారంలో సుప్రీంకోర్టు (న్యాయమూర్తుల సంఖ్య) సవరణ బిల్లు-2026ను లోక్‌సభలో, జాతీయ గౌరవ అవమానాల నిరోధక (సవరణ) బిల్లు-2026ను రాజ్యసభలో ప్రవేశపెట్టారు. ఇవి కాకుండా ఇన్‌కమ్ ట్యాక్స్ (సవరణ) బిల్లు, ఎంఎస్ఎంఈ అభివృద్ధి (సవరణ) బిల్లు, జనన మరణాల నమోదు (సవరణ) బిల్లు మరియు ఎఫ్‌సిఆర్‌ఎ (FCRA) సవరణ బిల్లులను కూడా సభ ముందుకు తీసుకురావడానికి ప్రభుత్వం యోచిస్తోంది.