ఇటలీ స్థానిక ఎన్నికల్లో వామపక్ష కూటమి అభ్యర్థి, కమ్యూనిస్టు రీఫౌండేషన్ పార్టీ నాయకుడు మాన్యుయెల్ మినెర్విని మోల్ఫెట్టా నగర మేయర్గా ఘన విజయం సాధించారు. మే 24-25 తేదీల్లో జరిగిన తొలి దశ ఎన్నికల్లో 44.57 శాతం ఓట్లు పొందిన ఆయన, జూన్ 7-8 తేదీల్లో జరిగిన రన్-ఆఫ్లో 67.47 శాతం ఓట్లు సాధించి ప్రత్యర్థి పియెట్రో మాస్ట్రోపాస్క్వాపై భారీ ఆధిక్యంతో గెలుపొందారు. దక్షిణ ఇటలీలోని పులియా ప్రాంతానికి చెందిన సుమారు 60 వేల జనాభా కలిగిన మోల్ఫెట్టా నగరంలో ఈ ఫలితం ప్రత్యేక రాజకీయ ప్రాధాన్యం సంతరించుకుంది. మినెర్విని నేతృత్వంలోని కూటమిలో కమ్యూనిస్టు రీఫౌండేషన్ పార్టీతో పాటు డెమోక్రాటిక్ పార్టీ, ఇతర ప్రగతిశీల పౌర సంఘాలు భాగస్వాములయ్యాయి. 36 ఏళ్ల మాన్యుయెల్ మినెర్విని వృత్తిరీత్యా మెకానికల్ ఇంజనీర్. విద్యార్థి దశ నుంచే కార్మిక హక్కులు, పర్యావరణ పరిరక్షణ, యుద్ధ వ్యతిరేక ఉద్యమాల్లో పాల్గొంటూ ప్రజా జీవితంలో చురుకైన పాత్ర పోషించారు. ఎన్నికల ప్రచారంలో ఉపాధి అవకాశాల విస్తరణ, ప్రజా సేవల బలోపేతం, సామాజిక సంక్షేమం, ప్రజా ఆస్తుల పరిరక్షణ వంటి అంశాలను ప్రధానంగా ప్రస్తావించారు. ఒకప్పుడు పశ్చిమ యూరప్లో అత్యంత శక్తివంతమైన కమ్యూనిస్టు ఉద్యమాలకు ఇటలీ కేంద్రంగా ఉండేది. అయితే 1991లో ఇటాలియన్ కమ్యూనిస్టు పార్టీ విచ్ఛిన్నమైన తర్వాత కమ్యూనిస్టు రాజకీయాల ప్రభావం క్రమంగా తగ్గిపోయింది. అలాంటి నేపథ్యంలో మోల్ఫెట్టాలో వామపక్ష అభ్యర్థి ఘన విజయం సాధించడం రాజకీయ విశ్లేషకుల దృష్టిని ఆకర్షిస్తోంది. ప్రస్తుతం ప్రధాని జార్జియా మెలోనీ నేతృత్వంలోని మితవాద -జాతీయవాద కూటమి ఇటలీలో అధికారంలో ఉన్న నేపథ్యంలో ఈ ఫలితం మరింత ప్రాధాన్యం సంతరించుకుంది.
ليست هناك تعليقات:
إرسال تعليق