ఆంధ్రప్రదేశ్ లో లేబర్ అడ్డాలను ప్రభుత్వం నిర్ణయించింది. సాధారణంగా కూలీలు పని కోసం రోడ్ల పక్కన వేచి చూసే పాత పద్ధతికి స్వస్తి పలికి, వారికి గౌరవప్రదమైన వసతులతో కూడిన కేంద్రాలను ప్రభుత్వం నిర్మించనుంది. తొలి దశలో అమరావతితో పాటు 15 ప్రధాన నగరాల్లో ఈ అత్యాధునిక లేబర్ అడ్డాలను ఏర్పాటు చేసి, అక్కడ కార్మికులకు అవసరమైన కనీస సౌకర్యాలను కల్పించడమే కాకుండా, వారిని ఆర్థికంగా బలోపేతం చేసేలా ప్రణాళికలు సిద్ధం చేశారు. ఈ కేంద్రాలు కేవలం విశ్రాంతి గదులుగానే కాకుండా, కార్మికుల నైపుణ్యాన్ని మెరుగుపరిచే స్కిల్ డెవలప్మెంట్ సెంటర్లుగా పనిచేయడం ఈ పథకంలో భాగం. పని లేని రోజుల్లో కార్మికులు ఖాళీగా ఉండకుండా, అక్కడ అందుబాటులో ఉండే అత్యాధునిక పనిముట్లతో శిక్షణ పొంది తమ వృత్తి నైపుణ్యాన్ని పెంచుకునే వీలుంటుంది. దీనివల్ల వారికి మార్కెట్లో మెరుగైన ఉపాధి అవకాశాలు లభించడమే కాకుండా, మారుతున్న సాంకేతికతకు అనుగుణంగా కొత్త పనులను నేర్చుకునే అవకాశం కలుగుతుంది. ఇది కార్మికుడిని కేవలం కూలీగా కాకుండా ఒక నైపుణ్యం కలిగిన నిపుణుడిగా మార్చే ప్రయత్నం. సంక్షేమంతో పాటు భద్రతకు పెద్దపీట వేస్తూ, కార్మికులకు, వారి కుటుంబాలకు ఈఎస్ఐ ఆస్పత్రుల ద్వారా కార్పొరేట్ స్థాయి ఉచిత వైద్యం అందించనున్నట్లు ముఖ్యమంత్రి చంద్రబాబు నాయుడు ప్రకటించారు. అమరావతి, అచ్యుతాపురం వంటి పారిశ్రామిక ప్రాంతాల్లో కొత్త ఆస్పత్రుల ఏర్పాటుతో పాటు, ప్రమాదవశాత్తు జరిగే మరణాలకు లేదా సాధారణ మరణాలకు ఇచ్చే పరిహారాన్ని కూడా ప్రభుత్వం పునరుద్ధరించింది.
ليست هناك تعليقات:
إرسال تعليق