ఊర్వశి సోదరుడు, నటుడు కమల్ రాయ్ మృతి

ప్రముఖ నటి ఊర్వశి సోదరుడు, నటుడు కమల్ రాయ్ (54) బుధవారం కన్నుమూశారు. గత కొంతకాలంగా అనారోగ్యంతో బాధపడుతున్న ఆయనకు, చెన్నైలోని తన నివాసంలో ఒక్కసారిగా గుండెపోటు రావడంతో తుదిశ్వాస విడిచారు. చిన్న వయసులోనే కమల్ మరణించారనే వార్త విన్న సినీ వర్గాలు తీవ్ర దిగ్భ్రాంతి వ్యక్తం చేస్తున్నాయి. కమల్ రాయ్ నేపథ్యం మొత్తం సినీ కళాకారులతో నిండినది. దక్షిణ భారత ఇండస్ట్రీలో స్టార్ హీరోయిన్లుగా వెలిగిన ఊర్వశి, కళారంజని, దివంగత నటి కల్పనలకు ఈయన సొంత సోదరుడు. వెండితెరపైనే కాకుండా బుల్లితెరపై కూడా కమల్ తనకంటూ ప్రత్యేక గుర్తింపు తెచ్చుకున్నారు. తన సోదరి ఊర్వశి, మలయాళ స్టార్ హీరో మోహన్‌లాల్ నటించిన 'యువజనోల్సవం' చిత్రంలో కమల్ విలన్‌గా నటించి మెప్పించారు.  'కల్యాణ సౌగంధికం', 'సాయిజ్యం', 'కొల్లిల్లాక్కం' వంటి సినిమాల ద్వారా నటుడిగా మంచి పేరు సంపాదించుకున్నారు. పలు విజయవంతమైన టీవీ సీరియల్స్‌లో కూడా నటించి గృహిణులకు చేరువయ్యారు.