ఎయిర్ప్లేన్ మోడ్ లేదా ఫ్లైట్ మోడ్ అనేది స్మార్ట్ఫోన్లు, టాబ్లెట్లు, ల్యాప్టాప్ల వంటి పరికరాలలో ఉన్న సెట్టింగ్. ఇది అన్ని వైర్లెస్ ప్రసారాలను పూర్తిగా ఆఫ్ చేస్తుంది. విమానం మోడ్ ఆన్లో ఉంది అంటే డివైజ్ సెల్యులార్ నెట్వర్క్లకు (కాల్స్, డేటా), వైఫై, బ్లూటూత్, జీపీఎస్ కి కనెక్ట్ ఉండదు. విమానం సున్నితమైన నావిగేషన్, కమ్యూనికేషన్ సిస్టమ్లకు ఎటువంటి భంగం కలగకుండా ఈ సదుపాయం ప్రత్యేకంగా విమానంలో ఉపయోగించేందుకు రూపొందించారు. ఫోన్ బ్యాటరీ త్వరగా అయిపోతుంటే ఈ మోడ్ని ఆన్ చేయడం ద్వారా ఫోన్ బ్యాటరీని ఆదా చేసుకోవచ్చు. ఫోన్లో ఎయిర్ప్లేన్ని ఆన్ చేసినప్పుడు అది అన్ని రేడియో ట్రాన్స్మిటర్లను ఆఫ్ చేస్తుంది. ఈ ఫీచర్ ఫోన్ను బయటి ప్రపంచం నుండి పూర్తిగా వేరు చేస్తుంది. ఎయిర్ప్లేన్ మోడ్ని ఉపయోగించడం ద్వారా బ్యాటరీ జీవితాన్ని ఆదా చేయడానికి మీరు ఫోన్ను ఛార్జ్ చేస్తున్నప్పుడు ఈ మోడ్ని ఆన్ చేయాలి. అప్పుడు ఛార్జింగ్ వేగంగా ఉంటుంది. అలాగే ఫోన్ బ్యాటరీ తక్కువగా ఉన్నప్పుడు ఈ మోడ్ను ఆన్ చేస్తే ఫోన్ త్వరగా స్విచ్ ఆఫ్ కాదు. ఆన్ చేసినప్పుడు ఎయిర్ప్లేన్ మోడ్ అన్ని వైర్లెస్ యాక్టివిటీని ఆఫ్ చేస్తుంది. అప్పుడు ఫోన్ తక్కువ పని చేస్తుంది. అందుకే తక్కువ బ్యాటరీ పవర్ ఖర్చవుతుంది. ప్రయాణిస్తున్నప్పుడు ఇది చాలా ఉపయోగకరంగా ఉంటుంది. అలాగే పని చేస్తున్నప్పుడు, చదువుతున్నప్పుడు లేదా విశ్రాంతి తీసుకుంటున్నప్పుడు ఎయిర్ప్లేన్ మోడ్ని యాక్టివేట్ చేసుకోవచ్చు. మొబైల్ నెట్వర్క్ సమస్యలను పరిష్కరించడానికి కూడా ఎయిర్ప్లేన్ మోడ్ ఉపయోగించబడుతుంది. స్మార్ట్ఫోన్లో నెట్వర్క్ సరిగ్గా లేకుంటే ఒకసారి ఎయిర్ప్లేన్ మోడ్ను ఆన్ చేసి, 2 నిమిషాల తర్వాత ఆఫ్ చేయండి. దీని సహాయంతో ఫోన్లోని నెట్వర్క్ను పరిష్కరించవచ్చు. ఎలక్ట్రోమాగ్నెటిక్ రేడియేషన్ ప్రమాదం ఎక్కువగా ఉన్న ప్రదేశాలలో స్మార్ట్ఫోన్ ఎయిర్ప్లేన్ మోడ్ చాలా ఉపయోగకరంగా ఉంటుంది. అందుకే అలాంటి ప్రమాదం ఉన్న ప్రదేశంలో ఉంటే, ఎయిర్ప్లేన్ మోడ్ను ఆన్ చేయడం మంచిది. మొబైల్ ఫోన్లు విడుదల చేసే రేడియేషన్ ఆరోగ్యంపై తీవ్ర ప్రభావం చూపుతున్న సంగతి తెలిసిందే. అయితే అవసరం లేనప్పుడు ఫోన్ ను ఫ్లైట్ మోడ్ లో ఉంచడం ద్వారా ఈ రేడియేషన్ ను చాలా వరకు తగ్గించుకోవచ్చు.
ليست هناك تعليقات:
إرسال تعليق