ఫ్రాన్స్‌లో విద్యారంగంలో సంస్కరణలు కోరుతూ కొన్ని రోజులుగా దేశవ్యాప్తంగా కొనసాగుతున్న ఆందోళనలు రోజు రోజుకు ఉద్రిక్తంగా మారుతున్నాయి. ఈ క్రమంలో అనేక నగరాల్లో మరోసారి హింసాత్మక ఘటనలు చోటు చేసుకున్నాయి. పారిస్ సిటి సెంటర్‌కు సమీపంలో ఆందోళనకారులు ఓ కారుతో పాటు దుకాణానికి నిప్పు పెట్టారు. వీరిని చెదరగొట్టేందుకు పోలీసులు బాష్పవాయు గోళాలు, జల ఫిరంగులు ప్రయోగించి పరిస్థితి అదుపులోకి తెచ్చే ప్రయత్నం చేశారు. ఫ్రాన్స్‌లో మూడో అతి పెద్ద నగరమైన లియోన్‌లోనూ అల్లర్లు చెలరేగాయి. ఓ టూరిస్టు ఆఫీస్‌కు నిప్పు పెట్టారు. మార్సెయిల్ నగరంలోనూ ఓ పోలీస్‌ స్టేషన్‌తో పాటు పలు దుకాణాలను ఆందోళనకారులు ధ్వంసం చేశారు. ఈ ఆందోళనలకు కార్మిక సంఘాలు కూడా మద్దతిచ్చినట్లు సమాచారం. హింసాత్మక ఘటనలకు పాల్పడుతున్న వారిపై చర్యలు తీసుకుంటున్న పోలీసులు.. దేశవ్యాప్తంగా 166 మందిని అరెస్టు చేసినట్లు పేర్కొన్నారు.
