ప్రభుత్వ మెడికల్, ఇంజనీరింగ్ కళాశాలల్లో ప్రవేశం పొందే ఎస్సీ, ఎస్టీ విద్యార్థులకు ఫీజు వసూలు చేయకూడదని ఒడిశా ప్రభుత్వం నిర్ణయం

ఒడిశా రాష్ట్రంలోని ప్రభుత్వ మెడికల్ , ఇంజనీరింగ్ కళాశాలల్లో ప్రవేశం పొందే ఎస్సీ, ఎస్టీ వర్గాల విద్యార్థుల నుండి ఎలాంటి ప్రవేశ రుసుము లేదా ట్యూషన్ ఫీజు వసూలు చేయకూడదని నిర్ణయించినట్లు ఒడిశా ముఖ్యమంత్రి మోహన్ చరణ్ మాఝీ ప్రకటించారు. ప్రభుత్వ రంగంలోని అన్ని వైద్య , ఇంజనీరింగ్ విద్యాసంస్థల్లో ఎస్సీ, ఎస్టీ విద్యార్థులకు ఈ ఉచిత విద్యా సౌకర్యం వర్తిస్తుంది. ప్రవేశ రుసుముతో పాటు కోర్సు పూర్తయ్యే వరకు చెల్లించాల్సిన వివిధ రకాల ట్యూషన్, అకాడమిక్ ఫీజులను పూర్తిగా రాష్ట్ర ప్రభుత్వమే భరిస్తుంది. ఆర్థిక ఇబ్బందుల కారణంగా ప్రతిభావంతులైన గిరిజన, దళిత విద్యార్థులు ఉన్నత చదువులకు దూరం కాకుండా చూడటమే ఈ పథకం యొక్క ముఖ్య ఉద్దేశం.సాంకేతిక మరియు వైద్య విద్య రంగాలలో ఎస్సీ, ఎస్టీ విద్యార్థుల భాగస్వామ్యాన్ని పెంచడం ద్వారా వారి సామాజిక, ఆర్థిక పురోగతికి బాటలు వేయవచ్చని ప్రభుత్వం భావిస్తోంది. ప్రభుత్వం తీసుకున్న ఈ నిర్ణయంపై రాష్ట్రవ్యాప్తంగా విద్యార్థులు, విద్యార్థి సంఘాలు మరియు ప్రజాసంఘాల నుండి హర్షం వ్యక్తమవుతోంది.