తెలంగాణ లోని ములుగు జిల్లా కర్రెగుట్టల దట్టమైన అటవీ ప్రాంతంలో అనుకోని విధంగా పాత మందుపాతర పేలడంతో వెదుల్లచెరువు కాలనీకి చెందిన గిరిజనుడైన మడకం నాగేశ్వరరావు ప్రాణాలు కోల్పోయాడు. మృతుడు నాగేశ్వరరావు అటవీ ప్రాంతానికి వెదురు బొంగులను సేకరించేందుకు వెళ్లారు. ఆ సమయంలో ప్రమాదవశాత్తు గతంలో మావోయిస్టులు పాతిపెట్టినట్లుగా భావిస్తున్న మందుపాతరపై ఆయన కాలు పెట్టడంతో ఒక్కసారిగా భారీ శబ్దంతో పేలుడు సంభవించింది. ఈ తీవ్రమైన పేలుడు ధాటికి నాగేశ్వరరావు అక్కడికక్కడే ప్రాణాలు కోల్పోయారు. ఈ హఠాత్పరిణామంతో ఆయన కుటుంబంలో విషాద ఛాయలు అలుముకున్నాయి. సమాచారం అందుకున్న వెంటనే పోలీసులు వేగంగా స్పందించి ఘటనా స్థలానికి చేరుకున్నారు. ఆ ప్రాంతాన్ని పరిశీలించి విస్తృతంగా తనిఖీలు చేపట్టారు. గతంలో మావోయిస్టు ప్రాబల్యం ఉన్న ఈ ప్రాంతంలో అప్పట్లో అమర్చిన ల్యాండ్మైన్లు ఇంకా భూగర్భంలోనే ఉండిపోవచ్చని అధికారులు అనుమానిస్తున్నారు. ఈ ఏడాది ఆరంభంలో కూడా ఇదే ప్రాంతంలో ఒక మందుపాతరను నిర్వీర్యం చేస్తున్న సమయంలో జవాను ఒకరు గాయపడిన ఉదంతాన్ని వారు గుర్తు చేశారు. ఈ ఘటన నేపథ్యంలో అటవీ ప్రాంత వాసులు అత్యంత అప్రమత్తంగా ఉండాలని పోలీసులు స్పష్టమైన హెచ్చరికలు జారీ చేశారు. అడవిలోకి వెళ్లే సమయంలో ఎక్కడైనా అనుమానాస్పద వస్తువులు, వైర్లు లేదా ఇతర పరికరాలు కనిపిస్తే వెంటనే పోలీసులకు సమాచారం ఇవ్వాలని కోరారు. ప్రస్తుతం కర్రెగుట్టల చుట్టుపక్కల ప్రాంతాల్లో మందుపాతరల అన్వేషణ కోసం భద్రతా బలగాలు కూంబింగ్ను మరింత ముమ్మరం చేశాయి.
إرسال تعليق