ఎస్బీఐ బ్యాంకు ఉద్యోగుల కళ్లలో కారం పొడి చల్లి రూ.4 లక్షలు చోరీ : 30 నిమిషాల వ్యవధిలో నిందితుడిని అరెస్టు చేసిన పోలీసులు

మహారాష్ట్రలోని నాగ్‌పూర్‌లో స్థానిక స్టేట్ బ్యాంక్ ఆఫ్ ఇండియా శాఖలోకి చొరబడిన గుర్తుతెలియని వ్యక్తి, బ్యాంకు ఉద్యోగుల కళ్లలో కారం పొడి చల్లి కౌంటర్ నుంచి రూ.4 లక్షల నగదును లూటీ చేసి పరారయ్యాడు. సాయంత్రం సుమారు 6 గంటల సమయంలో రోజువారీ లావాదేవీలు ముగించుకుని సిబ్బంది నగదు లెక్కిస్తున్న వేళ ఈ ఘటన చోటుచేసుకుంది. ఉన్నట్టుండి జరిగిన ఈ దాడితో తీవ్ర భయాందోళనలకు గురైన బ్యాంకు సిబ్బంది వెంటనే స్థానిక పోలీసులకు సమాచారం అందించారు. సమాచారం అందుకున్న తక్షణమే నాగ్‌పూర్ పోలీసులు అప్రమత్తమై రంగంలోకి దిగారు. బ్యాంకు ఆవరణలోని సీసీటీవీ కెమెరా ఫుటేజీలను క్షుణ్ణంగా పరిశీలించి, నిందితుడి కదలికలు, పారిపోయిన మార్గాన్ని సాంకేతిక బృందాల సాయంతో గుర్తించారు. పక్కా సమాచారంతో నగరవ్యాప్తంగా నాకాబందీ నిర్వహించి, ఘటన జరిగిన కేవలం 30 నిమిషాల వ్యవధిలోనే నిందితుడిని పోలీసులు చాకచక్యంగా అదుపులోకి తీసుకున్నారు. అతని వద్ద నుంచి దోచుకెళ్లిన రూ.4 లక్షల నగదును పూర్తిగా స్వాధీనం చేసుకున్నారు. నిందితుడిని అరెస్టు చేసి స్టేషన్‌కు తరలించామని, అతనికి పాత నేర చరిత్ర ఏమైనా ఉందా, ఈ దోపిడీలో ఇంకెవరి ప్రమేయమైనా ఉందా అనే కోణంలో లోతుగా విచారణ జరుపుతున్నామని పోలీసులు వెల్లడించారు.