మధుమేహ వ్యాధిగ్రస్తులకు వర్షపు నీటిలో ఉండే బ్యాక్టీరియా, ఫంగస్ వల్ల కాళ్లకు ఇన్ఫెక్షన్లు వచ్చే ప్రమాదం చాలా ఎక్కువ. చిన్న గాయం అయినా నిర్లక్ష్యం చేస్తే గ్యాంగ్రీన్ లేదా కాళ్లు తీసేసేంత తీవ్రమైన సమస్యలకు దారితీస్తుంది. వర్షాకాలంలో వాతావరణం ఎప్పుడూ తడిగా ఉంటుంది. వర్షపు నీటిలో నడవడం వల్ల నేలపై ఉండే బ్యాక్టీరియా, క్రిములు కాళ్లకు సులభంగా చేరతాయి. ఇక డయాబెటిస్ ఉన్నవారికి రోగనిరోధక శక్తి కాస్త తక్కువగా ఉంటుంది కాబట్టి, ఫుట్ ఇన్ఫెక్షన్లు వేగంగా వ్యాపిస్తాయి. షుగర్ ఉన్నవారిలో కాళ్లకు రక్తప్రసరణ సరిగ్గా జరగకపోవడం, నరాలు దెబ్బతినడం (న్యూరోపతి) వంటివి జరుగుతుంటాయి. ఇక దీనివల్ల కాళ్లపై చిన్న కట్స్, పగుళ్లు లేదా దెబ్బలు ఉన్నా నొప్పి సరిగ్గా తెలియదు. ఇవే పుండ్లుగా (ఫుట్ అల్సర్స్) మారి చివరకు కాళ్లు తీసివేసే పరిస్థితిని తెస్తాయి. బయటి నుంచి ఇంటికి వచ్చిన వెంటనే కాళ్లను శుభ్రంగా కడుక్కోవడం చాలా ముఖ్యం. ఇక వర్షంలో కాళ్లు తడిస్తే వెంటనే పొడి గుడ్డతో తుడిచి ఆరబెట్టుకోవాలి. వేళ్ల మధ్యలో తడి ఉండకుండా చూసుకోవాలి, లేదంటే ఫంగల్ ఇన్ఫెక్షన్లు వచ్చే అవకాశం ఉంటుంది. ఇంట్లో అయినా, బయట అయినా సరే షుగర్ ఉన్నవారు చెప్పులు లేకుండా నడవకూడదు. ఇక వర్షపు నీటిలో లేదా తడి నేలపై నడిచేటప్పుడు పాదాలను పూర్తిగా కప్పి ఉంచే, నీరు ఇంకని చెప్పులను వాడటం మంచిది. ఇంటికి వచ్చాక ఒక టబ్లో గోరువెచ్చని నీళ్లు తీసుకుని, సబ్బుతో కాళ్లను శుభ్రంగా రుద్ది కడగాలి. శుభ్రమైన టవల్తో తడి లేకుండా తుడిచిన తర్వాత కాళ్లను ఎప్పటికప్పుడు పరీక్షించుకోవాలి. ఇక ఏమైనా చిన్న గాయాలు లేదా మార్పులు కనిపిస్తే వెంటనే వైద్యులను సంప్రదించాలి. వర్షాకాలంలో షుగర్ పేషెంట్లు చిన్న జాగ్రత్తలు పాటిస్తే పెద్ద ప్రమాదాల నుంచి తమ పాదాలను కాపాడుకోవచ్చు. సరైన ఫుట్ కేర్ తీసుకోవడం, షుగర్ స్థాయిలను నియంత్రణలో ఉంచుకోవడమే ఆరోగ్యకరమైన జీవితానికి పునాది.
0 Comments