ఢిల్లీలో 20 శాతం ఇథనాల్ కలిపిన E20 పెట్రోల్ వాడకానికి వ్యతిరేకంగా టాక్సీ, రవాణా రంగానికి చెందిన యూనియన్లు నిరసన జ్వాలలు రగల్చాయి. వాహనాల కోసం మార్కెట్లో మునుపటిలా స్వచ్ఛమైన పెట్రోల్ ను కూడా ఉంచాలని, పెట్రోల్ బంకుల్లో ప్యూర్ పెట్రోల్ లేదా E20 లలో ఏదో ఒకదాన్ని ఎంచుకునే వెసులుబాటును వాహనదారులకు కల్పించాలని డ్రైవర్ల సంఘాలు కేంద్ర ప్రభుత్వాన్ని బలంగా డిమాండ్ చేస్తున్నాయి. E20 పెట్రోల్ వినియోగించడం వల్ల ఇంధన సామర్థ్యం తగ్గిపోతోందని డ్రైవర్లు ఆరోపిస్తున్నారు. లీటరుకు ఇచ్చే మైలేజ్ పడిపోవడంతో రోజూ ఇంధనం కోసం పెట్టే ఖర్చు విపరీతంగా વધીపోయిందని చెబుతున్నారు. E20 లోని ఇథనాల్ శాతం వల్ల వాహనాల ఇంజన్ భాగాలు, రబ్బర్ పైపులు, గ్యాస్కెట్లు త్వరగా తుప్పుపట్టడం లేదా పాడైపోవడం జరుగుతోందని వాపోతున్నారు. ముఖ్యంగా బిఎస్-4 మరియు 2015 కంటే ముందు తయారైన పాత మోడల్ వాహనాలు ఈ పెట్రోల్ వల్ల ఎక్కువగా సమస్యలు ఎదుర్కొంటున్నాయని పేర్కొన్నారు. మైలేజ్ తగ్గడం ఒకవైపు, పదే పదే వాహనాలు రిపేర్లకు రావడంతో మెయింటెనెన్స్ ఖర్చులు రెట్టింపయ్యాయని టాక్సీ, క్యాబ్ డ్రైవర్లు ఆవేదన వ్యక్తం చేస్తున్నారు. రోజంతా కష్టపడినా చివరికి చేతిలో ఏమీ మిగలడం లేదని వారు అంటున్నారు. స్వచ్ఛమైన పెట్రోల్ అందుబాటులోకి తేవాలి…పెట్రోల్ బంకుల్లో E20 తో పాటు నాన్-బ్లెండెడ్ (ప్యూర్ పెట్రోల్) ను కూడా విక్రయించాలి. E20 ఇంధనం వల్ల వాహనాలపై పడుతున్న ప్రభావంపై రవాణాదారులు, ఆటోమొబైల్ నిపుణులు మరియు వినియోగదారులతో కూడిన స్వతంత్ర కమిటీతో సమీక్ష నిర్వహించాలి. బ్లెండెడ్ ఇంధనం అమ్ముతున్నప్పుడు దాని ధరను కూడా స్వచ్ఛమైన పెట్రోల్ కంటే తక్కువగా నిర్ణయించాలి. ప్రభుత్వం ఈ నిర్ణయాన్ని పునఃపరిశీలించకపోతే తమ ఆందోళనలను మరింత తీవ్రతరం చేస్తామని టాక్సీ యూనియన్ల నాయకులు హెచ్చరిస్తున్నారు.
ليست هناك تعليقات:
إرسال تعليق