మానవ శరీరం సరిగ్గా పనిచేయాలంటే విటమిన్స్తో పాటు మినరల్స్ కూడా చాలా అవసరం. వాటిలో ముఖ్యమైనది సోడియం. ఇది సాధారణంగా మనం తినే ఉప్పులో ఉంటుంది. సోడియం శరీరంలో నీటి సమతుల్యతను కాపాడటం, నరాల సంకేతాలను పంపడం, మసిల్స్ సరిగ్గా పనిచేయడం వంటి ముఖ్యమైన పనుల్లో కీలక పాత్ర పోషిస్తుంది. కానీ ఈ సోడియం స్థాయి తగ్గిపోతే సమస్యలు ప్రారంభమవుతాయి. వైద్య భాషలో దీనిని "హైపోనాట్రేమియా" అంటారు. ఇది చిన్న సమస్యలా కనిపించినా, సరైన సమయంలో గుర్తించకపోతే ప్రమాదకరంగా మారే అవకాశం ఉంటుంది. సోడియం తగ్గిపోవడానికి అనేక కారణాలు ఉన్నాయి. ముఖ్యంగా వేసవిలో ఎక్కువగా చెమట పడటం వల్ల శరీరం నుండి సోడియం బయటకు వెళ్లిపోతుంది. అలాగే వాంతులు, డయరియా, ఎక్కువగా నీరు తాగడం లేదా కొన్ని మందులు వాడటం వల్ల కూడా సోడియం స్థాయి తగ్గిపోవచ్చు. చాలా మంది ఆరోగ్యంగా ఉండాలనే ఉద్దేశంతో ఎక్కువ నీరు తాగుతారు, కానీ అది కూడా కొన్ని సందర్భాల్లో హానికరంగా మారవచ్చు. సోడియం తక్కువగా ఉన్నప్పుడు శరీరం కొన్ని సంకేతాలు ఇస్తుంది. తలనొప్పి, బలహీనత, చక్కర్లు, వాంతులు వంటి లక్షణాలు కనిపించవచ్చు. పరిస్థితి తీవ్రమైతే కన్ఫ్యూజన్, మసిల్స్ క్రాంప్స్, అపస్మారం, ఫిట్స్ కూడా రావచ్చు. కొందరికి హార్ట్ బీట్ కూడా అసమానంగా మారే అవకాశం ఉంటుంది. అయితే నిపుణులు చెబుతున్నదేమిటంటే, సోడియం లోపం నేరుగా గుండెపోటుకు కారణం కాకపోయినా, హార్ట్ రిథమ్ను ప్రభావితం చేసి ఇతర సమస్యలకు దారి తీస్తుంది. ఈ సమస్యను నివారించడానికి సమతుల్య ఆహారం తీసుకోవడం చాలా ముఖ్యం. శరీరంలో నీరు, ఎలక్ట్రోలైట్ల సమతుల్యతను కాపాడాలి. వేసవిలో ఎక్కువగా చెమట పడితే ORS, కొబ్బరి నీరు, నిమ్మరసం వంటి పానీయాలు తీసుకోవడం మంచిది. కానీ నీటిని కూడా మితంగా తాగాలి. అవసరానికి మించి నీరు తాగితే సోడియం స్థాయి మరింత తగ్గే ప్రమాదం ఉంటుంది. సోడియం లోపం చిన్న విషయం కాదు. లక్షణాలు కనిపిస్తే వెంటనే వైద్యులను సంప్రదించడం మంచిది. సరైన ఆహారం, సరైన జీవనశైలి పాటిస్తే ఈ సమస్యను సులభంగా నివారించవచ్చు.
No comments:
Post a Comment