తెలంగాణలోని సంగారెడ్డి జిల్లా కంగ్టి మండలంలోని రాసోల్ గ్రామంలో అంగన్వాడీ టీచర్గా పనిచేస్తున్న వసంతకుమారిని గ్రామస్థులు అకారణంగా హింసించారు. ఆమె భర్త ప్రభాకర్ ఆర్థిక పరమైన మోసాలకు పాల్పడి ఊరు వదిలి పారిపోవడంతో, కోపంతో ఉన్న బాధితులు ఆయన భార్యపై తమ ప్రతాపం చూపించారు. విధుల్లో ఉన్న ఆమెను బలవంతంగా పట్టుకుని తాళ్లతో చెట్టుకు కట్టేయడం స్థానికంగా తీవ్ర కలకలం రేపింది. డబ్బులు తిరిగి ఇవ్వాలంటూ ఐదుగురు గ్రామస్థులు వసంతకుమారిని తీవ్రంగా వేధించారు. కేవలం చెట్టుకు కట్టేయడమే కాకుండా, ఆమె జుట్టు కత్తిరించి గాడిదపై ఊరేగిస్తామంటూ బెదిరించారు. బాధితురాలు ఎంత వేడుకున్నా వదలకుండా అవమానకరంగా ప్రవర్తించారు. చివరకు గ్రామంలోని పెద్దలు వచ్చి జోక్యం చేసుకోవడంతో ఆమెకు విముక్తి లభించింది. తనపై జరిగిన అఘాయిత్యంపై బాధితురాలు వసంతకుమారి ధైర్యంగా కంగ్టి పోలీసులను ఆశ్రయించి ఫిర్యాదు చేశారు. సాయవ్వ, బాలమణి, వైద్యనాథ్, బండ్యప్ప, రాములు అనే వ్యక్తులు తనను వేధించారని ఆమె పేర్కొన్నారు. బాధితురాలి ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. చట్టాన్ని చేతుల్లోకి తీసుకుని మహిళను అవమానించిన వారిపై కఠిన చర్యలు తీసుకుంటామని పోలీసులు హెచ్చరించారు.
ليست هناك تعليقات:
إرسال تعليق