తెలంగాణ లోని ఆదిలాబాద్ జిల్లా పిప్రిలో పీపుల్స్ మార్చ్కు మూడేళ్లు పూర్తైన సందర్భంగా జరిగిన బహిరంగ సభలో ముఖ్యమంత్రి రేవంత్ రెడ్డి మాట్లాడుతూ ఆదిలాబాద్ ప్రజలు అమాయకులు మాత్రమే కాకుండా, అన్యాయానికి వ్యతిరేకంగా పోరాడే ధైర్యం కలిగినవారని అన్నారు. ఎన్నికల సమయానికి మాత్రమే రాజకీయాలు పరిమితం కావాలని, ఆ తర్వాత అభివృద్ధి లక్ష్యంగా పార్టీలకు అతీతంగా పని చేయాలని తమ ప్రభుత్వం భావిస్తున్నదని తెలిపారు. రాజకీయాల్లో నాయకత్వంపై విశ్వాసం ఎంతో కీలకమని తెలంగాణ అన్నారు. ఎన్నికలకు ముందు డిప్యూటీ సీఎం భట్టి విక్రమార్క చేపట్టిన పీపుల్స్ మార్చ్ పాదయాత్రను ఆయన గుర్తుచేశారు. పిప్రి నుంచి ప్రారంభమైన ఆ యాత్ర సుమారు 1400 కిలోమీటర్ల మేర సాగి ప్రజల్లో విశేష స్పందన పొందిందన్నారు. ఆ సమయంలో ఆదిలాబాద్ ప్రజలు ఇచ్చిన మద్దతు, ధైర్యమే తమను అధికారంలోకి తీసుకువచ్చిందని పేర్కొన్నారు. అధికారంలోకి వచ్చిన తర్వాత ఈ జిల్లాపై ప్రత్యేక దృష్టి పెట్టామని ఆయన స్పష్టం చేశారు. ప్రజాస్వామ్యంలో ప్రతిపక్షాల పాత్ర ఎంతో ముఖ్యమని, ప్రజల సమస్యలను లేవనెత్తేందుకు ప్రతిపక్ష ఎమ్మెల్యేలు, ఎంపీలకు వేదిక కల్పించడం తమ బాధ్యతగా భావిస్తున్నామని చెప్పారు. చట్టసభల్లోనే కాకుండా బహిరంగ వేదికలపై కూడా వారికి మాట్లాడే అవకాశం ఇస్తున్నామని తెలిపారు. ఈ విధానం ద్వారా ప్రజాస్వామ్య విలువలను కాపాడుతూ పరస్పర గౌరవానికి ప్రాధాన్యం ఇస్తున్నామని అన్నారు. గత ప్రభుత్వ కాలంలో ఈ విధమైన సంస్కృతి లేకపోయిందని, అప్పట్లో ప్రతిపక్ష నేతలను నిరోధించేవారని విమర్శించారు. అభివృద్ధి విషయంలో ఎలాంటి రాజకీయ భేదాలు చూపడం లేదని సీఎం స్పష్టం చేశారు. ప్రతిపక్ష ఎమ్మెల్యేలు ఉన్న నియోజకవర్గాలకు కూడా సమానంగా నిధులు, పథకాలు అందిస్తున్నామని తెలిపారు. బోథ్, నిర్మల్ వంటి ప్రాంతాల్లో తమ పార్టీ ఎమ్మెల్యేలు లేకపోయినా అభివృద్ధి ఆగలేదని చెప్పారు. ప్రజలు ఎవరికైనా ఓటు వేసినా, ప్రభుత్వం అందరికీ పనిచేయాల్సిందేనని ఆయన వ్యాఖ్యానించారు. మహిళలకు ఆర్టీసీ బస్సుల్లో ఉచిత ప్రయాణ సౌకర్యం అందిస్తున్నామని, ఈ పథకానికి ఇప్పటివరకు భారీగా నిధులు ఖర్చు చేసినట్టు చెప్పారు. అదేవిధంగా 200 యూనిట్ల వరకు ఉచిత విద్యుత్ అందిస్తున్నామని, పేదలకు ఇండ్లు కల్పించేందుకు ఇందిరమ్మ హౌసింగ్ పథకం అమలు చేస్తున్నామని వివరించారు. జిల్లాల పునర్వ్యవస్థీకరణ అంశంపై మాట్లాడిన సీఎం, ప్రస్తుతం కేంద్ర మార్గదర్శకాల కారణంగా మార్పులు చేయలేని పరిస్థితి ఉందన్నారు. అయితే గడువు పూర్తైన తర్వాత న్యాయ కమిషన్ ఏర్పాటు చేసి సమస్యలను పరిష్కరించే దిశగా చర్యలు తీసుకుంటామని హామీ ఇచ్చారు. ఆదిలాబాద్ అభివృద్ధి దిశగా పలు కీలక ప్రాజెక్టులను ప్రకటించారు. తమ్మిడి హెట్టి నుంచి ప్రాణహిత ప్రాజెక్టును తిరిగి ప్రారంభించి ఈ ప్రాంతానికి నీటి వనరులు అందించే లక్ష్యం ఉందన్నారు. అదేవిధంగా ఆదిలాబాద్లో ఎయిర్పోర్టు నిర్మాణం, పెద్ద పారిశ్రామిక వాడ ఏర్పాటుతో ఉద్యోగ అవకాశాలు కల్పించనున్నామని తెలిపారు. బాసర ఆలయ అభివృద్ధి పనులు కూడా చేపట్టినట్టు చెప్పారు. ఈ ప్రాంతాన్ని విద్యా, పర్యాటక కేంద్రంగా తీర్చిదిద్దేందుకు కట్టుబడి ఉన్నామని సీఎం పేర్కొన్నారు.
ليست هناك تعليقات:
إرسال تعليق