భారత్, యూరోపియన్ యూనియన్ మధ్య కుదిరిన చారిత్రాత్మక స్వేచ్ఛా వాణిజ్య ఒప్పందం భారత స్టాక్ మార్కెట్లలో సరికొత్త ఉత్సాహాన్ని నింపింది. మంగళవారం జరిగిన ఈ వాణిజ్య ఒప్పందాన్ని ప్రధాని నరేంద్ర మోడీ "మదర్ ఆఫ్ ఆల్ డీల్స్"గా అభివర్ణించారు. ఈ ఒప్పందం కారణంగా రెండు ప్రాంతాల మధ్య దాదాపు 97 శాతం వస్తువులపై సుంకాలను తగ్గించడం లేదా పూర్తిగా తొలగించడం జరుగుతుంది. ఈ మెగా డీల్ నేపథ్యంలో స్టాక్ మార్కెట్లలో సరికొత్త జోష్ నెలకొంది. బుధవారం ప్రారంభ ట్రేడింగ్లో బీఎస్ఈ సెన్సెక్స్ 600 పాయింట్లకు పైగా లాభపడి 82,503 పాయింట్ల గరిష్ట స్థాయిని తాకింది. ఎన్ఎస్ఈ నిఫ్టీ 150 పాయింట్లకు పైగా పెరిగి 25,350 మార్కును దాటింది. మార్కెట్ పెరగడంతో ఇన్వెస్టర్ల సంపద కేవలం కొన్ని గంటల్లోనే సుమారు రూ.2.9 లక్షల కోట్లు పెరిగింది. భారత్-ఈయూ ఒప్పందంతో టెక్స్టైల్స్, ఫార్మా, ఐటీ సర్వీసెస్ వంటి రంగాలకు ఐరోపా మార్కెట్లలో భారీ అవకాశాలు దక్కనున్నాయి. ఐరోపా నుంచి వచ్చే కార్లు, వైన్ వంటి వస్తువులపై భారత్ కూడా పన్నులు తగ్గించనుంది. అమెరికన్ డాలర్తో పోలిస్తే రూపాయి విలువ 11 పైసలు పెరిగి 91.57 వద్ద ట్రేడవుతోంది. డాలర్ ఇండెక్స్ బలహీనపడటం రూపాయికి కలిసొచ్చింది. అమెరికా అధ్యక్షుడు డొనాల్డ్ ట్రంప్ ఆసియా దేశాల నుంచి దిగుమతులపై 25 శాతం పన్ను విధిస్తామన్న హెచ్చరికలను వెనక్కి తీసుకోవడంతో అంతర్జాతీయ మార్కెట్లలో సానుకూల వాతావరణం ఏర్పడింది. గత కొన్ని రోజులుగా ఒడిదుడుకులకు లోనైన మార్కెట్, కీలకమైన మద్దతు స్థాయిల వద్ద కొనుగోళ్ల మద్దతును పొందింది.
ليست هناك تعليقات:
إرسال تعليق