ఐక్యరాజ్యసమితి సెక్రటరీ జనరల్ ఆంటోనియో గుటెర్రస్ తన పదవీకాలంలో చివరి ఏడాదిలోకి అడుగు పెట్టిన సందర్భంగా విలేకరులతో మాట్లాడుతూ "ప్రపంచ సమస్యలు ఏదో ఒక శక్తి (అమెరికాను ఉద్దేశించి) ఆర్డర్లు వేయడం వల్ల కానీ, లేదా రెండు అగ్రరాజ్యాలు (అమెరికా, చైనా) ప్రపంచాన్ని తమ ప్రభావ ప్రాంతాలుగా విడగొట్టుకోవడం వల్ల కానీ పరిష్కారం కావు" అని ఆయన స్పష్టం చేశారు. డొనాల్డ్ ట్రంప్ తన రెండో విడత పదవీ కాలంలో 'స్పియర్స్ ఆఫ్ ఇన్ఫ్లుయెన్స్' అనే పాత కాలపు విధానాన్ని మళ్లీ తెరపైకి తెచ్చారని విమర్శలు గుప్పించారు. ముఖ్యంగా పశ్చిమ దేశాల్లో అమెరికా ఆధిపత్యాన్ని పునరుద్ధరిస్తామని ట్రంప్ చేస్తున్న ప్రకటనలను గుటెర్రస్ తప్పుబట్టారు. ప్రపంచం మొత్తం అమెరికా కేంద్రంగా, చైనా కేంద్రంగా విడిపోవడం శాంతికి ముప్పు అని హెచ్చరించారు. అభివృద్ధి, శాంతి సుస్థిరంగా ఉండాలంటే అన్ని దేశాలు సమానంగా ఉండడమే ఏకైక మార్గమని ఆయన నొక్కి చెప్పారు. ఐక్యరాజ్యసమితికి అతిపెద్ద దాతగా ఉన్న అమెరికా ప్రస్తుతం ఐరాస ఏజెన్సీలకు నిధులను నిలిపివేయడంతో సంస్థ తీవ్ర ఆర్థిక సంక్షోభాన్ని ఎదుర్కొంటోంది. ట్రంప్ ఐరాసను విమర్శిస్తూ అమెరికా నేతృత్వంలోని శాంతి ప్రయత్నాలకు ఐరాస సహకరించడం లేదని ఆరోపిస్తున్నారు. దీనిపై స్పందించిన గుటెర్రస్ అంతర్జాతీయ శాంతి భద్రతల బాధ్యత కేవలం భద్రతా మండలిదే అని, దానిని సంస్కరించకుండా విమర్శలు చేయడం తగదని చురకలు అంటించారు. ఐరాసను అసమర్థ సంస్థ అని విమర్శించేవారే దానికి అవసరమైన సంస్కరణలను అడ్డుకుంటున్నారని ఆయన ఎద్దేవా చేశారు. అలాగే గుటెర్రస్ తన రెండో ఐదేళ్ల పదవీ కాలంలో ఉక్రెయిన్-రష్యా యుద్ధం, గాజాలో హమాస్-ఇజ్రాయెల్ పోరు, సూడాన్ సంక్షోభం, సిరియా అంతర్యుద్ధం వంటి క్లిష్ట పరిస్థితులను ఎదుర్కొన్నారు. ఈ అనుభవంతోనే ఆయన మాట్లాడుతూ.. అంతర్జాతీయ చట్టాలను కొందరు తుంగలో తొక్కుతున్నారని, సహకారం స్థానంలో విభేదాలు పెరిగేలా చేస్తున్నారని ఆయన ఆవేదన వ్యక్తం చేశారు. కేవలం ఒప్పందాలపై సంతకాలు చేయడం మాత్రమే శాంతి కాదని, సమస్యల మూలాలను పరిష్కరిస్తూ అంతర్జాతీయ చట్టాలకు కట్టుబడి ఉండటమే నిజమైన శాంతి అని పేర్కొన్నారు. వచ్చే ఏడాది ఐరాస కొత్త సెక్రటరీ జనరల్ను ఎన్నుకోనుంది. తన 10 ఏళ్ల సుదీర్ఘ ప్రస్థానంలో ఎన్నో అడ్డంకులు ఎదురైనా ఐరాస విలువల కోసం తాను పోరాడుతూనే ఉంటానని గుటెర్రస్ ప్రకటించారు.
إرسال تعليق