బీహార్ ప్రభుత్వం ఇకపై ఏ ప్రభుత్వ ఉద్యోగి అయినా ఫేస్బుక్, ఎక్స్ (ట్విట్టర్), ఇన్స్టాగ్రామ్ వంటి సామాజిక మాధ్యమాల్లో ఖాతా తెరవాలంటే ముందుగా ఉన్నతాధికారుల నుండి లిఖితపూర్వక అనుమతి తీసుకోవడం తప్పనిసరి చేసింది. డిజిటల్ ప్లాట్ఫారమ్లలో ఉద్యోగుల ప్రవర్తనను క్రమబద్ధీకరించడానికి, ప్రభుత్వ ప్రతిష్టకు భంగం కలగకుండా చూడటానికే ఈ నిర్ణయం తీసుకున్నట్లు అధికార వర్గాలు స్పష్టం చేశాయి. ఈ కొత్త మార్గదర్శకాల ప్రకారం, ఉద్యోగులు తమ వ్యక్తిగత సోషల్ మీడియా ఖాతాల కోసం ప్రభుత్వ అధికారిక ఈమెయిల్ ఐడీలను లేదా ప్రభుత్వ ఫోన్ నంబర్లను ఎట్టిపరిస్థితుల్లోనూ ఉపయోగించకూడదు. అలాగే, తమ పోస్టులలో ప్రభుత్వ లోగోలను వాడటం కానీ, తమ అధికారిక హోదాను ప్రదర్శిస్తూ ప్రచారం చేసుకోవడం కానీ పూర్తిగా నిషేధించారు. వ్యక్తిగత అభిప్రాయాలను ప్రభుత్వ నిర్ణయాలుగా ప్రజలు పొరబడకూడదనే ఉద్దేశంతో ఈ ఆంక్షలు విధించినట్లు తెలుస్తోంది. నకిలీ ఖాతాల ద్వారా తప్పుడు సమాచారాన్ని చేరవేసే వారిపై కూడా ప్రభుత్వం సీరియస్ దృష్టి సారించింది. ఎవరైనా ఉద్యోగి మారుపేర్లతో లేదా నకిలీ ఐడీలతో సోషల్ మీడియాలో ప్రభుత్వ వ్యతిరేక కార్యకలాపాలకు పాల్పడితే, వారిపై కఠినమైన క్రమశిక్షణ చర్యలు తీసుకోవడమే కాకుండా సర్వీస్ నిబంధనల ప్రకారం కఠినంగా శిక్షిస్తామని హెచ్చరించారు. ప్రతి ఉద్యోగి సోషల్ మీడియాలో బాధ్యతాయుతంగా వ్యవహరించాలని, నిబంధనలు ఉల్లంఘిస్తే ఉద్యోగ ముప్పు తప్పదని ప్రభుత్వం స్పష్టం చేసింది. డిజిటల్ స్పేస్లో క్రమశిక్షణను పెంపొందించడం, ప్రభుత్వ యంత్రాంగం పట్ల ప్రజల్లో నమ్మకాన్ని పెంచడమే ఈ కొత్త పాలసీ ప్రధాన లక్ష్యం. ప్రభుత్వ ఉద్యోగులు సామాజిక మాధ్యమాల్లో అనవసరమైన రాజకీయ చర్చలకు లేదా వివాదాలకు దారితీసే అంశాలకు దూరంగా ఉండాలని అధికారులు సూచించారు.
No comments:
Post a Comment