ఢిల్లీలో రూ. 50 లక్షలు దారి దోపిడి !

తూర్పు ఢిల్లీలోని అక్షరధామ్ టెంపుల్ కు కొన్ని మీటర్ల దూరంలోని పాండవ్ నగర్‌లో ఘజియాబాద్‌కు చెందిన చార్టర్డ్ అకౌంటెంట్ ఇద్దరు ఉద్యోగుల నుంచి తుపాకీతో బెదిరించి రూ. 50 లక్షలు దోచుకున్నారని పోలీసులు తెలిపారు. బాధితులైన మోహిత్ శర్మ , అరుణ్ త్యాగి పశ్చిమ ఢిల్లీలో ఒకరి వద్ద డబ్బు వసూలు చేసి మోటార్ సైకిల్‌పై ఘజియాబాద్ వైపు వెళ్తున్నారు. వారు ఆలయానికి సమీపంలో ఉన్న జాతీయ రహదారి-9పైకి వెళ్లబోతున్నప్పుడు మోటార్‌సైకిళ్లపై నలుగురు వ్యక్తులు తుపాకీలతో వచ్చి బెదిరించి డబ్బులు దోచుకున్నారు. శర్మ, త్యాగి తప్పించుకోవడానికి ప్రయత్నించగా, దొంగలు వారి బైక్‌లతో వారిని ఢీకొట్టారు. ఫలితంగా వారు రోడ్డుపై పడిపోయారు. దీంతో నగదు ఉన్న బ్యాగ్‌ని లాక్కొని అక్కడి నుంచి పారిపోయారు.