30 రోజుల్లో హ్యుండాయ్ ఎక్స్‌టర్ 8,154 కార్ల అమ్మకం

జూన్ నెల అమ్మకాల్లో హ్యుండాయ్ ఎక్స్‌టర్ 38.84 శాతం వార్షిక వృద్ధితో సరికొత్త రికార్డు సృష్టించింది. కేవలం 30 రోజుల్లోనే 8,154 మంది కొత్త కస్టమర్లు ఈ కారును కొనుగోలు చేయడం విశేషం. దేశీయ ఆటోమొబైల్ మార్కెట్లో తక్కువ బడ్జెట్‌లో ఎక్కువ ఫీచర్లు, అదిరిపోయే లుక్స్ ఇచ్చే కార్లకు ఎప్పుడూ డిమాండ్ ఉంటుంది. ఈ సూత్రాన్ని సరిగ్గా ఒడిసిపట్టిన హ్యుండాయ్ సంస్థ, మైక్రో ఎస్‌యూవీ విభాగంలో ప్రవేశపెట్టిన 'ఎక్స్‌టర్' ప్రస్తుతం మార్కెట్లో రారాజుగా దూసుకుపోతోంది. ఆకర్షణీయమైన డిజైన్, నమ్మకమైన భద్రత, జేబుకు చిల్లు పడకుండా చూసే మైలేజీ వంటి ఎన్నో ప్రత్యేకతలు ఈ చిన్న ఎస్‌యూవీని సామాన్యుడి కలల కారుగా మార్చేశాయి. అందుకే లాంచ్ అయినప్పటి నుంచి దీని క్రేజ్ రోజురోజుకూ పెరుగుతూనే ఉంది. ఇటీవల విడుదలైన జూన్ 2026 అమ్మకాల నివేదికను పరిశీలిస్తే ఎక్స్‌టర్ సాధించిన విజయం స్పష్టమవుతుంది. గత నెలలో 8,154 యూనిట్ల అమ్మకాలతో ఈ కారు సరికొత్త మైలురాయిని అందుకుంది. గతేడాది అంటే 2025 జూన్ నెలలో ఈ కారు కేవలం 5,873 యూనిట్లు మాత్రమే అమ్ముడైంది. దీనితో పోలిస్తే ఈ ఏడాది ఏకంగా 38.84 శాతం వార్షిక వృద్ధిని నమోదు చేసి హ్యుందాయ్ శ్రేణిలోనే అత్యంత విజయవంతమైన మోడళ్లలో ఒకటిగా నిలిచింది. కేవలం వార్షికంగానే కాకుండా, మే 2026 నెలతో (6,595 యూనిట్లు) పోల్చినా కూడా నెలవారీగా 23.64 శాతం వృద్ధిని కనబరిచి తన సత్తా చాటింది. హ్యుందాయ్ ఎక్స్‌టర్ ప్రారంభ ఎక్స్-షోరూమ్ ధర కేవలం రూ.5.81 లక్షల నుంచే మొదలవుతుంది. ఇక దీని టాప్-ఎండ్ వేరియంట్ ధర రూ.9.61 లక్షల వరకు అందుబాటులో ఉంది. వినియోగదారుల విభిన్న అవసరాలకు అనుగుణంగా ఈ కారు ఈఎక్స్, ఈఎక్స్ఓ, ఎస్ (S), ఎస్ ఓ (S O), ఎస్‌ఎక్స్, ఎస్‌ఎక్స్ఓ, ఎస్‌ఎక్స్ ఓ కనెక్ట్, స్పెషల్ నైట్ ఎడిషన్ వంటి ఆకర్షణీయమైన వేరియంట్లలో లభిస్తోంది. హ్యుండాయ్ ఎక్స్‌టర్ కేవలం లుక్స్ లోనే కాదు, మైలేజీలో కూడా ఎక్కడా తగ్గడం లేదు. ఇందులో 1.2 లీటర్ల శక్తివంతమైన పెట్రోల్ ఇంజిన్‌ను అందించారు. ఇది మాన్యువల్ గేర్‌బాక్స్‌తో లీటరుకు 19.4 కిలోమీటర్ల మైలేజీని ఇస్తుండగా, ఆటోమేటిక్  వేరియంట్లలో 19.2 కిలోమీటర్ల వరకు మైలేజీని ఇస్తుంది. ఇక ఇంధన ఖర్చులు మరింత తగ్గించుకోవాలనుకునే వారి కోసం కంపెనీ సీఎన్జీ (CNG) ఆప్షన్‌ను కూడా అందుబాటులో ఉంచింది. ఈ సీఎన్జీ వేరియంట్ ఏకంగా కిలో సీఎన్జీకి 27.10 కిలోమీటర్ల అద్భుతమైన మైలేజీని ఇస్తూ అందరినీ ఆశ్చర్యపరుస్తోంది. ఇందులో డిజిటల్ ఇన్‌స్ట్రుమెంట్ క్లస్టర్, వాయిస్ ఎనేబుల్డ్ స్మార్ట్ సన్‌రూఫ్, డ్యాష్ క్యామ్, ప్రయాణికుల రక్షణ కోసం స్టాండర్డ్‌గా 6 ఎయిర్‌బ్యాగ్‌లను అమర్చారు. తక్కువ బడ్జెట్ లో ఒక పవర్‌ఫుల్ ఎస్‌యూవీ రూపాన్ని, అధునాతన సేఫ్టీ ఫీచర్లను, తిరుగులేని మైలేజీని అందిస్తుండటమే హ్యుందాయ్ ఎక్స్‌టర్ విజయ రహస్యం. జూన్ నెలలో సాధించిన 38 శాతం వృద్ధి, ఈ కారుపై భారతీయ కస్టమర్లకు ఉన్న నమ్మకాన్ని మరోసారి స్పష్టం చేసింది.