గేయ రచయిత చంద్రబోస్ కు సోదర వియోగం !

ప్రముఖ గేయ రచయిత, ఆస్కార్ విజేత చంద్రబోస్ సోదరుడు రాజేంద్ర ఆకస్మిక గుండెపోటుతో మరణించారు. అన్నమయ్య జిల్లా కలికిరి ప్రాంతానికి చెందిన రాజేంద్ర వయసు అరవై ఏళ్లు. ఆయన గత కొంతకాలంగా బెంగళూరులో వ్యాపార పనులు చూసుకుంటూ అక్కడే స్థిరపడ్డారు. ఇటీవల కొన్ని వ్యక్తిగత పనుల నిమిత్తం స్వగ్రామమైన కలికిరికి వచ్చారు. శనివారం రాత్రి తన ప్రాణ స్నేహితుడు శ్రీనివాసరెడ్డి ఇంట్లో బస చేశారు. ఆదివారం ఉదయం నిద్రలేచిన తర్వాత రాజేంద్రకు ఛాతిలో స్వల్పంగా నొప్పి కలిగింది. దీంతో ఆయన వెంటనే అప్రమత్తమై స్థానిక ప్రైవేటు ఆసుపత్రికి వెళ్లి వైద్యులను సంప్రదించారు. అక్కడ ప్రాథమిక చికిత్స పొందిన అనంతరం, ఆరోగ్యం కాస్త కుదుటపడిందని భావించి ఆసుపత్రి బయటకు వచ్చారు. ఆకలి వేయడంతో కలికిరి క్రాస్ రోడ్డు వద్ద ఉన్న ఒక హోటల్‌లో టిఫిన్ చేయడానికి వెళ్లారు. అక్కడ ఆహారం తింటున్న సమయంలోనే ఆయనకు తీవ్రమైన గుండెపోటు వచ్చింది. ఒక్కసారిగా కుర్చీలోనే కుప్పకూలిపోయిన రాజేంద్రను చూసి హోటల్ సిబ్బంది, తోటి కస్టమర్లు హతాశులయ్యారు. స్థానికులు వెంటనే స్పందించి వైద్యులకు సమాచారం అందించినప్పటికీ ఫలితం లేకపోయింది. ఆయన ప్రాణాలు అప్పటికే పోయాయని వైద్యులు నిర్ధారించారు. సమాచారం అందుకున్న పోలీసులు సంఘటనా స్థలానికి చేరుకుని పరిస్థితిని సమీక్షించారు. రాజేంద్ర మరణ వార్త చంద్రబోస్ కుటుంబ సభ్యులకు చేరడంతో వారు కన్నీరుమున్నీరయ్యారు.