అమెజాన్‌ సరికొత్త వాల్‌ మౌంటెడ్‌ స్మార్ట్ డిస్‌ప్లేను ఆవిష్కరించింది. ఎకో షో 21 పేరిట దీన్ని తీసుకొచ్చింది. రెండేళ్ల క్రితం తీసుకొచ్చిన ఎకోషో 15కి మరింత అదనపు హంగులు జోడించడంతో పాటు, పెద్ద డిస్‌ప్లేతో ఎకోషో 21ను లాంచ్‌ చేసింది. ఎకోషో 15, ఎకో షో 21 రెండూ సేమ్‌ ఫీచర్లతో తీసుకొచ్చింది. అలెక్సా వాయిస్‌ అసిస్టెంట్‌, రిమోట్‌ సాయంతో పనిచేసే ఈ స్మార్ట్ డిస్‌ప్లేను వివిధ రకాలుగా వాడుకోవచ్చు. క్యాలెండర్‌, షాపింగ్‌ లిస్ట్‌, వాతావరణ వివరాలు, టు-డు లిస్ట్‌ కోసం ఉపయోగించొచ్చు. బోరింగ్‌గా అనిపిస్తే ప్రైమ్‌ వీడియో, యూట్యూబ్‌, నెట్‌ఫ్లిక్స్‌ కంటెంట్‌ను ప్లే చేయొచ్చు. కావాలనుకుంటే దీన్నో ఫొటో ఫ్రేమ్‌గానూ వాడుకోవచ్చు. అందులో మీ కుటుంబ సబ్యుల ఫొటోలను డిస్‌ప్లే చేయొచ్చు. ఇంట్లో కావాల్సిన చోట దీన్ని అమర్చుకోవచ్చు. ఇతర స్మార్ట్ డివైజులను ఎకో షో ద్వారా మేనేజ్‌ చేయొచ్చు. దీని ద్వారా ఆడియో, వీడియో కాల్స్‌ మాట్లాడుకోవచ్చు. మీరు బయట ఉన్నప్పుడు ఇల్లు ఎలా ఉంది? ఇంట్లో పెంపుడు జంతువులేమైనా వదిలేసి వెళ్లి ఉంటే వాటి పరిస్థితులను కూడా ఈ డివైజ్‌తో ఆరా తీయొచ్చు. అమెజాన్‌ నుంచి కొనుగోలు చేయొచ్చు. ఎకోషో 15 ధరను 299 డాలర్లుగా నిర్ణయించింది. మన కరెన్సీలో సుమారు రూ.25వేలు అన్నమాట. ఎకో షో 21 ధరను 399 డాలర్లుగా పేర్కొంది. అంటే సుమారు రూ.33వేలు ఉంటుంది. వీటిని భారత్‌కు తీసుకొచ్చేదీ లేనిది మాత్రం కంపెనీ వెల్లడించలేదు.
0 Comments